সময় বৰ নিষ্ঠুৰ !
নাছিৰ আহমেদ
শিমলাবাৰী গোৱালপাৰা
সময় গতি কৰিছে
নীৰৱ- নিৰৱিচ্ছিন্ন ভাৱে
পুৰণি পৃথিৱীখন নকৈ চাই লবলৈ
আমি বাৰে -ৰহণীয়া ৰঙৰ উৎসৱ পাতো।
হাতে হাত ধৰি, কান্ধত কান্ধ পাতি
মহা-মিলনৰ গীত গাওঁ; প্ৰাণ ঢালি নৃত্য কৰো ।
কিন্তু! সময় বৰ নিষ্ঠুৰ!
পুৰণি পৃথিৱীখন আলৰ বুঢ়া হয়
শেঁতা পৰা নয়ন -যুগল অসহায় !
সৰি পৰে লুণীয়া চকুলো;
ওঁঠ-যুৰিত কঁপনি, বাক-ৰুদ্ধ, গতি স্থৱিৰ !
পুৱাৰ কাঁচিয়লি ৰ'দত উম লওঁতে
মৰমৰ কাইটিৰ বুকুত লাগিল নিঠুৰৰ আঘাত !!
হেৰাই যায় পৃথিৱীৰ ৰূপ-ৰং-ৰস !
তথাপি, সময় গতি কৰিছে
নীৰৱ, নিৰৱিচ্ছিন্ন ভাৱে
আজি আমাৰ কণ্ঠত উদ্গীৰিত আগ্নেয় লাভা
দু-চকুত বিপ্লৱৰ অগ্নি-বৰ্ষণ -
পুৰণি পৃথিৱীৰ স্পন্দন-হীন দেহত
প্ৰাণ সঞ্চাৰ কৰিবলৈ আমি দৃঢ় প্ৰতিজ্ঞ !
যুগে-যুগে অতিকে' চেনেহৰ পৃথিৱীত সংহাৰ কৰা
দুষ্কৃতিকাৰী, শোষক, বিভেদ-কামী শক্তিক
দপ্ দপ্ কৈ জ্বলি থকা মেজিৰ জুইত দাহ কৰিমেই
সময় বৰ নিষ্ঠুৰ ! সময় বৰ নিষ্ঠুৰ!!
সময় গতি কৰিছে নীৰৱ নিৰৱিচ্ছিন্নভাৱে।
Doksiri দকচিৰি, ফেব্ৰুৱাৰী, ২০২৪
No comments:
Post a Comment