ALI A:YÉ LÍGANG ÉLA: SILOK MÉ:LOD
Purnajyoti Kumbang
Aíké í:rdí do:pínéla: leke ili-ikamki mirém rémné Misingké atégru:pé tani: opín kisapé kangkin sunané í:rdídé ‘Ali-A:ye Lígangé'. Sé Gí:dí:sí:písé Nérkíkpé aríg ilodlok dírbí katé:dung. Émdaggom líga:lo so:man-ni:tomémsin akampé inamko ka:pa:dag. A:né ru:yi mo:léglo du:la simín-siro rugnam odokké aríg inamdé turnané bélam mé:suné Mising réngamlok írdílo mo:lam agomko du:té:dag. Lendo a:dodokké toku ta:to-ya:yobulu líga:sém aríg-ísíng líggodnam írdípé ilento. Gínmur po:lo:lo Mising tani:yé guni aríg éla: ali a:ye atíém líggoddungai. Po:lo ara:lo ainé longéko ka:la mo:nulo guni amli pidgoddungai, ali a:ye líggodla édé longédo mé:po ménganna oi-ni:tom, gumrag maksongki í:r-pongkír dungai. Édémpé Ali a:yé lígang írdí idungai. 1956 dítagdokké Mising Ba:né Kébang lupa:la takam Misingei gínmur po:lolok a:pongarné Lígang longélokké do::nyi longédopé ido. Édé longé:kopé inam írdídok isang longédém "Lí:lup'' odokké itér longédém "Lí:len" Émna ludo.
Ali a:yé lígang ilod anyiko kapa:dag. Akodo kumli odokké akondé írdíé. Kumlilo opín kumli ilod-gíloddém odokké írdílo so:man-ni:tom, mé:po-ménganko kadag. Édémpila lula:dag líga:lo kapé aríg-uidém ménggéla idagji, édémípé so;man-ni:tomdémgom akampé ménggédag. Misingé lekelokkébo: aíké dírbí-dírlam mirém rémné tani: opínko. Édémpé a:né ru:yi burné amo:lo aríg ila aipé do:pa:-tí:pa:dungai. Émpigé:la suyum-siro internet adíso mo:písé aipé angubomdung. Sé ayirsé Mising opínsok léga:pé mé:pénamko kadung. Édé lomna angula gídolo ngoluk ajjiné opínlok do:nam tí:nam, dírbí-dírlam, agom-gomlabé pu:po-jarpo du:la:yene du:la:ma:yene? A:ne ru:yi mo:léglo du:la aríg ila do:namdém turnanépé sabné opínsok aríg iné réngamsé dítag dítaglo pu:mu asi bidyut, rago banyudbomna opan panala gídung. Édémí:pé leke ilodlok aríg ila silo kapésin mirém rémnama:yé. Opan panné opíné kapésin aíém aipé léngkansulama:yé.Silo sí:sa:né réngamé ménggabla ainé ilotki aíké kumli-dírbí igab-bomgab ma:mí:lo ngolu turné tani: opín émna lusula:ma:yé.
Anguru:pé Mising opínlok aíké yelam dírbí ara:lokké abarungko leke so:man ni:tom, ainé gomku, mannam dí:nam attaré yogbomdung. Édémbulum silo opínsok gomlab-yélamém aipé igab-bomgabla mo:si:né, gíbo-oboné tani: pí:ramdung. Agom-gomlab, dírbí-yelam du:mí:lo:pag opíndé turdung émna lula:dag. Mising dírbí-yelamsém kinbég alampé ponam, mosi:nam, la:lenkunam odokké pu:po-jarpo mola yelam mo:nudém burmo mí:lo:pag angu gíbad-obadné opín lédulo ainé aima:ko luposula odokké dírbí-yelam bika-langka:mínsumí:lo:pag ngoluk opínsé gíbad-obadla:yépé. Réngamlok murné mé:lod gílod, aima:ném mé:pagla ainédém langa:mí:loi opín dírbí-yelam mo:nudé asutko buryé odokké pontala gíyépé. Ali a:ye lígang írdísokki Mising opínsok agom, dírbí-yelamém aipé jarmola:nam burné mo:nuko ka:pa:dag. So opínsok poné sí:sang ope:yé írdísém ménggabla írga:pé ibopa:yé.
Doksiri দকচিৰি, ফেব্ৰুৱাৰী, ২০২৪
No comments:
Post a Comment