ভূতে কুটি খোৱা অৰণ্য
বিশ্বজিৎ শইকীয়া
কাৰ্বি আংলং
তাত কবৰ দিয়া হৈছে সিহঁতক
কবৰবোৰৰ ওচৰে-পাজৰে
মানুহে কোৱা-কুই কৰে-
তাত হেনো ফৰিংফুটা জোনাকতে ভূত ওলাই
অৰণ্যবোৰ কুটি খায়,
অৰণ্যৰ চিপাহীবোৰে মাণিক বিচাৰি
গণি থাকে ক্ষন।
অৰণ্যবোৰ শেষ হ'লে ভূতটো ওলাই আহে
জন উপত্যকালৈ,
সি পাহাৰ, নদী, ৰাস্তা, পথাৰ খায়
তাকো জন উপত্যকাত এটা ঘৰ লগা হ'ল,
সি এইবাৰ খালে
কাৰোবাৰ হাতৰ খাৰু, কাণৰ কেৰু
কাৰোবাৰ ভঁৰালৰ জহা, গৰালৰ শহা
তাৰ এটা অট্টালিকা হ'ল,
সেই উপত্যকাটোত থকা
আটাইবোৰ ঘৰৰ ভিতৰত ওখ ঘৰটোৱে তাৰ।
তাৰ ঘৰটো সাঁজোতে সাঁজোতে
কোনোবা বেঘৰ হ'ল,
কেইটামান বাঢ়িল কবৰৰ সংখ্যা
আকৌ ওলাব ভূত
কুটি খাব আন এখন অৰণ্য।
Doksiri দকচিৰি, মাৰ্চ, ২০২৪
No comments:
Post a Comment