DO:PUNKÉ DO:YING
Horish Dole:
Rokom ta:sukpé Do:punbí írsu -lasugge:la lu:jarpé gílénpé émna mé:la géru:sudung. Soyardok kabutsukuné ojíng ko:dém Do:punké né:ng Senébí bosangge:la lusangkang "Ya:me mè:sula sege sege:la aipé gígongkang. So gía:langkula tayedém dodopé ngo inong- gíno:la lé:bipé. Gíango:langkula jamnangku." Né:dok agomdém tadge:la Do:punbí lusangkang "Sé né:sé ai aropé gílén-gía:douém sémmo:pé lutíkolo ngok ainé tuptémsin lupagbomdubo:né. Ngo ai okolo siyya:né?"
"Siyya:né? Olo gíténgolo lo:tu:pé sika:langka émna ru:né-pínémé sokkíddíko kumna:sin sika:mang. No sibídmílo ngo mé:bíd mé:sardanpébong. Okolo siyen sita. Nom ngo ka:rasula:ma:bo." Né:dok édémpé lunamdém tadge:la Do:punbí kapéi amírdé míryatsangka:némpé ansukang. Sagídém léko gíge:la bík oglensunam pinkang apin arémdém léngkodoi mépagge:la agom- asog luma:pé ukumdokké gílénna gíkang.
Milbo:dém aglí:dung émna Senébí ukum ager okokosin germa:pé ojíng ko:dém bíbomna ané abu ukumpé gíkangku. Yumdéng ayirdo ané abudé urríglangkula:sin Senébí gíkuma:pé dungko ara:do bík ba:boyké omé Rémi:bí lutatko lubito, "Baiya magbomé ukum gídokudodo lamtélo ga:riyé tubdatto émdagman. No tatpa:ma:danei? Élé siyésong turyésong émna amme lupomdag." Agomdém tadge:la Senébí bagémpé lomsa:la édílopéiké émna bírodém goksuge:la motor baikki duglíkkosulangkula ukum lotta:do:pé píngangkunamé lottado béjéko do:lu: taniyé dagla du:dopé ka:pa:to. Senébí baigdokké sumneddanna duga:la kangkunammé bík milbong Do:punbí iyyé gérgérra okkomsin kinsuma:pé lottado kétpagla dung. Senébí édém kangge:la siyang kérkérra jé:sangkang, "Aíné aína, no kapikan? Kapé sémpé ikan? Daropto, daropto. Ngo nom édílosin okokosin émna luge:ma:bo. No kama:mílo sé nok aosé:la ngo kapé turyén ? Daropto, daropto, daropto." Né:dok miksidé Do:punké migmodo díkadla odokké jé:la kabnamdém tadge:la okkomsin kinsuma:pé kédla du:né Do:punbí kinsulangkula dadapé kokí kokíla lusangkang, "No ngom gíté:lo sika:langka émna lo:dém pedoman. Ngo silo nok asin mé:namdèm ibitagbo. Aodém aipé ka:sí:la:bo." Do:punbí luté:doi ngag émpakkang.
Doksiri দকচিৰি, ফেব্ৰুৱাৰী, ২০২৪
No comments:
Post a Comment