চহৰত চিঞৰবোৰ
অংকুৰণ আৰ্ফ
চহৰত চিঞৰবোৰ চটফটাই আছে
চিঞৰৰ চেঁপাত চিঞৰ মৰিছে
চিঞৰৰ গচকত চেপেটা লাগিছে
চিঞৰৰ ভিৰত চিঞৰ হেৰাইছে
চিঞৰৰ কোবত চিঞৰ চিটিকি পৰিছে
চিঞৰে চিঞৰক চোঁচৰাই নিছে
চিঞৰে চিঞৰক চেঁপি ধৰিছে
মুঠতে চহৰত চিঞৰবোৰ চটফটাই আছে
পুৱাৰ প্ৰেচাৰ কুকাৰটোৰ চিঞৰ
দেশৰ বাতৰি বিলাই ফুৰা হকাৰজনৰ চিঞৰ
স্কুল-বাছৰ চিঞৰ
সৰু-ডাঙৰ গাড়ী-মটৰবোৰৰ চিঞৰ
ট্ৰেফিক পুলিচজনৰ হুইচেলৰ চিঞৰ
চানা বেচি ফুৰা মানুহজনৰ পেঁপাটোৰ চিঞৰ
ফুটপাথৰ অন্ধ মানুহজনৰ নাগাৰাযোৰৰ চিঞৰ
ৰাতি আন্ধাৰৰ আঁৰত ডাস্টবিনত কোনোবাই
পেলাই যোৱা নৱজাতকৰ চিঞৰ
চহৰৰ নিষিদ্ধ এলেকাত আন্ধাৰে চুৱা কৰা
ছোৱালীজনীৰ চিৎকাৰ ভৰা চিঞৰ
দূৰ্ঘটনাত শিৰ চিগি পৰা ডেকাল'ৰাটোৰ অন্তিমটো চিঞৰ
হোটেলৰ কোনোবা এটা কোঠাত
গোপনে ফেনত ওলমি থকা অচিন মৃতদেহটোৰ
গোপনৰো গোপন চিঞৰ
ৰজাঘৰৰ সংগোপন কক্ষত
নিশা গৰজি উঠা নৰখাদক চিঞৰ
কাৰাগাৰত বন্দী মানুহবোৰৰ হৃদয়ৰ চিঞৰ
আদালতত ন্যায়- অন্যায়ৰ সপক্ষে-বিপক্ষে
গৰজি উঠা চিঞৰ
নিশা অবৈধভাৱে লুকুৱাই নিয়া
মালবাহী ট্ৰাকৰ চিতৰ তলত লুকুৱাই নিয়া
টকাবোৰৰ গোপন চিঞৰ
ইমান চিঞৰ
ইমান চিঞৰ
চহৰত চিঞৰবোৰ চটফটাই আছে
চিঞৰৰ চেঁপাত চিঞৰ মৰিছে
চিঞৰৰ গচকত চিঞৰ চেপেটা লাগিছে
চিঞৰৰ ভৰত চহৰখন ঠেৰেঙা লাগিছে
ইমান চিঞৰৰ মাজত
কোনে শুনিব
কোনে বুজিব
তোৰ দুখভৰা চিঞৰ
অ' মোৰ হৃদয়।
Doksiri দকচিৰি, মে, ২০২৪
No comments:
Post a Comment