বাট
গাৰ্গী ভূঞা
১
উন্নয়নশীল দেশ!
পথ নিৰ্মাণ আৰু উন্নীতকৰণৰ বাবে
সহজেই টকাৰ আবণ্টন
২
পথ নিৰ্মাণ কৰা শ্ৰমিকৰ হাত দুখন
আলকেটেৰাৰ দৰে ক'লা
বাটটোও ক'লা সেইবাবে
৩
ময়ো বাট এটা বান্ধিছো
বাটটোৱে মনটো ঘায়ল কৰে বাবে
কাষে কাষে হালধি খেতি কৰিছোঁ
৪
আমি লাপি-লুপা মানুহ
দেশ নিৰ্মাণত যোগদান নাথাকিলেও
পথ নিৰ্মাণত আছে
৫
বাটবোৰ আচলতে সাঁথৰ
গৈ নোপোৱা গন্তব্যৰ বাবেও
আৰু এটি সৰল অথবা তীক্ষ্ণ মন্তব্যৰ বাবেও...
শেষত:
সকলো উৎকণ্ঠাৰ ওৰ পেলাই
সকলোৰে বাবে এটাই বাট হওক !
সম্ভাব্য দেশৰো উন্নতি হ'ব !
হাতৰ দৰে বাটবোৰো ক'লা নহয় !
কোনো বাটে আহত নকৰে মনবোৰক...!
আৰু দেশ নিৰ্মাণতো সকলোৰে যোগদান থাকিব !
Doksiri দকচিৰি, মে, ২০২৪
No comments:
Post a Comment