GÍ:DÍ

 GÍ:DÍ

Bhaigeswor Pogag

Gí:dí:dé aipakpé lagiru:namko.Gí:dí:dé dírbí dírlab odokké yelam kumli:ém lokké lupansunamém mitpansumola asin gépumsumodakku. Gí:díé gí:dí írnam légapé appíngé gírík oríksumodagkku.Odokké:sin gí:dídé ngoluké dírbí émlang yelamém aya:bosumodoku. Yenamlok yepumsumokunam agerém gí:díé bojeko gerdag.

 Gí:dí sí:pí kídarsé ngoluké yenamsok abékko.Ngoluké du:téng dakténg takamso gí:dí bojeko kadung. Gí:dídé tani: yenamso  to:dí to:dílokké togapsubomla yedung. Gí:dí sí:pí kama:mílo tani:yenamsé émmumé. Gí:dí sí:pí kídarsé tani: mé:díra du:yem mé:pola du:monanéko. Ngoluké Bharot mo:rumso bojeko ka:po kangané gí:díé dung. Asom mimong ara:sogom bojeko ainé ainé gí:díé dung.Mising réngamkégom gí:dí kasung. Lupé lumílo gí:dí kamané réngamé mo:píso kamang.

   Gí:dísém dírbí dírlab odokké yelam kumli: kídardok léga: pétompé gí:díém imang.Gí:dí kídardé tani: réngamém bojeko ainé ainé amaném bidag.Gí:díé du:pansula du:né bíro bíromé, ajon arumém, yigo magbo appíngém gíkumsumola ayangém du:yabodag. Appíngém aíkémpé mé:pumsumodag.Mé:dír mé:so kídardém mitpansula longéko aséng amanpé yirman so:manko manbodag.Gí:dí po:nu:lo opan mirém kama:pé, abíng ame: kama:pé appíngé gukumsula gí:díém írmanbodag.

  Bojeya:pé ko:kang kídaré miné míjí:ngém péyam mé:pola gí:dí po:nungém nu:man-ya:dag. Buluké légapé gí:dídokké lukéngé sémpé lulado-So:man moman, Pitang, Ambug odokké anu bédu gasor génamé émna mé:dag. Émpila ko:kangé gí:díé a:yekumílo asé:do. Gí:dílo kamanggom anu galuk aborko ko:kangém rébido.

  Gí:dílo yirman so:manam odokké dukkí dukpag inam kídardé émna mé:dag.Émpila gí:díém tani: yenamlo lagiru:dag mé:do. Gí:dídokki anu si:sang odokké ko:kangé bojeko anu anu do:yingém kinnadag.

 GÍ:DÍÉ ASINÉM GÉPUMSUMODAG

Tani:é tani:ké lédulo gí:díém  nu:mando. Tani:é édílai lumín monínsula asin tare géla du:daggom gí:dí sí:pé a:yekumílo tani: asin angukonpé idakku. Gíné longé kídardém mitpansugela anu asiném gémodakku. Kamanggom du:namo:dém orpansula odokké akoné akoném mibo tomla gí:dí amaném donamko ido.

 Ngoluké Bharot mo:rumso Holi, Dipaboli, Kristmas, I:d, Durga puja, Bihu, Ali A:ye Lígang  émla bojeko gí:díé du:ng. Édé gí:dí kídardo  akoné akoném ka:ríksula aséng anam bimínsudo. Akoné akonké gí:dílo tomla mibo o:do.Atí asin tare kamínsuma:pé gíka:mínsudo. Hindu, Musolman, Sikh, Kristan émna asin gépansuma:pé appíngé asé:la doman tí:man, yirman so:manmílo ayangé duyarbosudo. Gí:díkokki réngamlok ko:kang kídarém aipé ayang asé:bosula yebosuladopé lukai mokaido. Émpila mo:téng amo:lo du:do:gom aíké gí:dí ormaném ommangém léngkanpé aido. Aíké gí:dí po:nungém mitpansunamdé aíém mitpansunamé. Gí:dí po:nu:dé ngoluké kangkinsunané dírbíé.

  Ko: ko:néng kídaré gí:dí nu:mannam légapé ager geryemílo bulu akoné akoném ríksula lupo taumínsula kangkinmíndo.Bulu léko lakkopé ager gerdopé ubidangko pa:do.Akoné akonkélok kinma:nam kídarém ka:yir moyirsudopésin ubidangém pa:do. Aíké ope: pe:lungém ríksumínsula kangkinmínsudoku.

GÍ:DÍÉ ÉRANGÉM GÍPUMSUMODAKKU

  Gí:dílok lukéngém sémpésin lulado. Du:pansula du:né tani: kídarém longé atéro:lo gípumsumodoku odokké léko lakkopé du:pumsula doman tí:manko dola dokupé gíkumsumodoku. Akoné koném ríksulangkula mé:podoku.Donam tí:nam mokolo ko:kang kídaré ané abu lédulo du:pumsulangkula asin do:yingém kísarsula doku. Gí:díé okum érangém aipé asébodoku odokké ayang a:bom pa:mínsudoku. Ko:kang kídaré ato ayo, bíro bímé buluké lédulo du:la  longéko yirman so:manko iladakku.Gí:dí domanko:lo:pé goglígnam  tani:é gí:dílo gíkumsuyekumílo tani: ayangé  99% kopé anínbosudakku émna ludag.

 Gí:díé akoné akoném aman bímínsudo.Akoné akoném lupo taubosudo.Gí:dílo ko:kangém ayang aséng bika:mínsudopé luyirdo.Ato ayo odokké abí:yané kídarém kumsudopé luyirdo.Ko:kang kídaré donam amaném akoné akoné goksula orpansula dodopé luyirdo.Abí:né kídaré akoné akoné gí:dí aséngém binamém ame:né kídaré ka:yirsudo. Lupé lumílo gí:dídé:gom pogo kin-golok kosakko.Gí:díém mé:pagla tani: réngamé du:la:mang. Gí:díé kama:mílo dírbíé kamang,Dírbíé kama:mílo gí:díésin kamang. Émyemílo gí:dí dé:lang díbídé akoné akondoké pí:ramdém orpanbosula du:né réngamsok bottané amanko.Ngoluk Mising réngamsi:gom angu tani: opín kídarkémpé dírbí mirémné opínmko. Ngoluké Ali A:ye Lígang, Dobur uyu, Amrag, Po:rag atí atí gí:dí kídarsém du:yar malaju, Bomyar laju. Aíké gí:díé kaju aíé bomgapsulaju, Mising dírbísém mo:píso du:yar molaju. Mo:pí mo:rumso Mising gí:dí kídarsém kangkinbolaju.

Doksiri দকচিৰি, জুন, ২০২৪