LO:TU: MIRÉM

LO:TU: MIRÉM

Mg. Bhobo Dole:

  Murkongém tulasonilo kíka:mínsulai émna mastordém lubilang.Sé:ko i:d yayéji ? Bíkkémpin mastorém ngo dítakko ula lé:ladag émna yogmo kané ayodokki (Nappa:dokki) aí béttésuné so:bo Ba:durké lure: ré:la lunam agomdé Karmug mastorké yeru:do runggokpé yinga:la bí ludung - Buluk érangé ginggo:la ngolu do:lu:so gi:rasudung. A:rampé opan-ki:panné érangé. Ngoluk éra:lo pagbo gírasula donné. Potikang monné? Émpige:la ngom murkongki kíyé ? Sobo adorko kola éddíko labdém pa:dang. Airu:pé pa:mílo lí:yingko pa:dupéyam. Alo-mírsí rénapéi pí:ma:so:lo.

       Ba:durké mirémnamdém amme: aipé ka:mang.Akon-asagé ludung -amiké so:bom dopso:la kola mirém rémdung. Língkoko so:bom régmílo sumnyosin sido. Réngamé sogabmílo dorrongém démsodge:la go:rum tumye. Dopsong “case”ko “courd”-lo gíla dung-ngéi. Murkongko kayem,gari:ko réyém tani:yém kangkinma:pé iyopén ? Mirém rémdung émnai gu:tunsuyopén? Sidagdo sé:kosin nottako bomnangkumang émna aí aídé lusula dung.

        Karmug mastordé géryod-gérmatpé agom lumang. Pu:npé ludag.Mé:su dírbí dírbomném bí ka:lí:mang. Gu:tunsula agom lunamémsin tadlí:mang. Adí ise-siyenémsin ka:límang. Édémpin agerlok bím amme tolígmang.

        Longékoném Ba:durké ru:rub angkang. Bí yumé-longépé tí:ropkang. Ta:s érra érropkang. E:me yadla murkongém ambukpé pidgongkang. Lamku-kérang kinsuma:pé angkir bidmap pa:nam murkongém mopidamto.

         Yumdékoném tíngge:la dugdodolo pobug pogo poné ko:ko yari yarla dungkolokkém dukketo. Bím pulis sobomlangkula go:rupé mélíkto. E:medé:sin mé:dír-mé:so:la po:péké aipé mé:nam ko:dokképé dukpakkang. Bík turnamdok loladdé mitkíramkang. Odo bí ludung su:pag Murko:dém “doga palalo” kímílo mastordokké i:d ya:ye émna lude:suto.

Doksiri দকচিৰি, অক্টোবৰ, ২০২৪