NÉBÍNGKÉ AGER

 NÉBÍNGKÉ AGER

Anuj Yein

Disangmukh, Sibsagor

 

 Nébíng émmíloi ngolu kindo ko:kang bíné Nébíng. Nébíng émmílo atí atí agerrok amin minnam lukéng kudung.Nébíng émmílo o:kai ager tarungém Ka:si mésíné tani: midumdém nébíng émna ludo.Nébí:dé édé ager taru:dog mé:tin sunam ru: Nébíng nguluk réngam ara:lo baumko ka:pa:dung.

          Sipé-1)Ko:bíné Nébíng,

2) Lusar- potinnok Nébíng, dokké 

3)Atí atí Kéba:lok Nébíng.

       Sémpé, lukanpé Ko bíné Nébíng agomdém- Se:kai ané- abu du:daggom sekkai kamané, ajjiné  ojíng ko-ko:né:ngém kanggabné nébíng ako kado. Édé ojíng ko:dém néríng dokké tu:yi do:pé ka:si mosípé ido.Apin binam,así írnam, galub nípula gémonam botta:do:pé nébí:dé ka:sí:nam agerém gerpa:dag.Ojíng ko:dé alab garkin sula télé do:mírtopé dé:lang ka:bon, Odo nébí:dok agerdé gerpídla méleddo.

     Sidém nguluk réngam ara:lok du:né okumnok ko:bíné Nébíng émna ludo.

      Dépila, Sidé gompir  sokkéi kayirsul tatyirsula ngoluk su:pakké la:lennam pilennam atí atí Lusar potinnok Nébíng ako kadung.Édé nébí:dé Lusard Potindém la:lenkapé gídodém atí atí ngasod kado.Édé ngasoddé sémpé lukanpé, Nébí:dé murkong kamílo  bíkké a:íké atékpé la:lennam gíng-gímílo bík aminki la:lendo.Dokké, réngam léngangé la:len mílo Lusar Potindém tamnenpé atí atí mé:tom,do:nying gomsar,do:mug, ajon do:jíg,do:yar tukumsula Lusar Potindém po:lo pínyilok manggom po:lo pumnok la:lennam ager tarungém gerpídla gerpé ido.

  Dokké,Nébídé a:íké alag sogonnok murkong yarge:la édé Lusar Potindém tamsarnam ager tarungém gerpído.Édé Lusar,lutad ,Potindém mo:dumlok du:né mongke, do:lung,bangke ,ngoluk Mising taka:m réngam arra:lo:pé Siloké longkí lok ngok taunam agom apirko

    Sémpé -

      Sékké Lusar-potiném 

     Íddík arrém bige:la

      Se:kob réla poridun ?

  

       Sékké a:í dobo:ngém

      Íddík asin omínsul 

      Se:kob gíla ka:sí:dun ?

      Sidé, ngasoddé Nébíngké atékpé tébégé,i:dé.Jo:dumsuné ope:ko bíkké kadung, Émpigela dung silo kamang.

    Sidé Nébíng gompir sokkéi sémpé lukanpé, Lusar Potindém tamsarnam léngangé írroi émna jérobné Mising réngam amo:so írgaboné Migang ga:néko miro midumko lenpé lagiye.Ang pítala ngo dung Mimag mogéné ngo gíyar boye emna dakor korné midumko silo lentoka emna sidé adnam sokki nolum appíngém lupangko.Lupé lumílo abígé kama:mílo agomé turyarma:ye, Agomé turyarma:mílo dírbé kama:ye.Dépila Agom sém turyarmomílo abígém adyir sutoka, mising Potindém poyirsutoka, murkong bila Lusar Potindém réla porikítoja.Odopag, Nébingké gernam agerdé arré kayé:pé.

      Léddarpé, Kéba:nébing, Sidé gompir sokkéi sémpé lukanpé -Réngam arra:la atí atí ngasod kídarrok popídnam léngangé mo:dum do:lung,motaglo Kébang kadung.Édo bulu du:yarnam borígsuné kabangko kadag.

Édé kéba:do Nébí:dém lumtomna abuko du:dag.Boríg kéba:do Abu ako, oi-abu ako, dokké luyirné abu ahumko,Angngoko, dokké Nébí:dok ame:nébíng ako/annyiko kado.Édém bulum tani:kisa:pé midumé abako kamílo 31/51/101 boríg kéba:do Abu,oi-abu,Luyir abu, dokké nébíng anyni dém luté:la atí atí kosaglo bigabla médo.Simsiro atékpé a:íké lamtélok mé:jo mé:lamné tani:kisa:pé nérkíkpé naré:pé édémpin ager tarungém gerpídla gerpé ido.

   Sipé,Sidé gompir sokkéi sémpé lukanpé, Nébí:dé ojíng ko:dé aki:banam bojéla nébí:dé atí atí nésin kusere:ko bila:sin bitumla:mang,su:pag kapiyen,Bí írang opéyém dokké abu ané kídarém lubila kinam ka:la lomna gíbola ka:pé ido.Nébí:dok alag do murkong sortiyang kosin kamang.Odo ayirdo írang opéyé:lang abu ané kídaré édé ojíng ko:dém kinam ka:pídpé ido.Bulu appídéi akoné akoném asin ayang tolígmunsula léríkpé gílenpé lagidag.Nok ngasoddo ngo noluk ngasoddo ngulu dung.Édémpépag asin gíng-gímílo nguluk mising réngamésin tani: émna kangkin sulaye,luhit sulaye.

     Lédusém lusetko sémpé lukanpé, Nébí:dém Mipag pé Sompadog, English pé Editor, dokké Misipé Nébíng émna ludo.

  Nébíngké lukéng lupénam agomsém ngo íddíko alang kadopé adyar kinmang.Ngok asinsok ménam dokké sidé déng amo:sok bértubsul kabegnam kídí:dém sidé nébíng émna gampirso até: motung.Nébíngké lukéng,ager tarungé abarungko dungkang édé appídém poriné taka:pé sutkanbimílo ngo mé:podag.

Doksiri দকচিৰি, অক্টোবৰ, ২০২৪