BÍRDUG ROKOM

 

BÍRDUG ROKOM

            Mg. Kamaleswor Chungkrang 

Aipé Rokompé

Yupté:dokké kinsukang

O:koi be:dagarnémpé tatto

Émpila asin asino:ngé mé:suto

Okoka:n ngom bé:roblígnédé

Rokpodé:sin kama:da: 

Ki:ki:ri:ki kokrobéilíkpésin 

Po:pékémpé bogum si:lungésin 

Kattoikuma:bong oikoliyéi 

Kabroblíkpésin

Aríglok nangol gurné

Ya:méyésin kattoikuma:bong

Arígdo oi kappésin

Lottalok donam íné

Mímbírésin kamangéibong

Ki:par tungtung tangtang

Émna bé:pésing

Émpila darobge:la tetpo:to

Aiyo:pé mé:mi:la mé:to

Asubdokké bérlenna ka:to

Sangga tolokké lí:re:pé

Do:mírté unsa:dung

Ísíng annékidí:dé

Muksub tapamé

Miksi díkampé

Abug abukpé

Bérag bérag émna

Le:né-sanné annélo

Dílettíla dung

Do:nyidé kanggabla

Murkong dílednémpé

Undopé ka:lígdung

Ka:mi:la ka:la du:toném

Asinbé agor kéiglo:pé

Jinga:la gíkampé

O:rí:pakpé jinga:tíla gíkang

Asinsé gesi geyomné

Mo:pípé ipakkang

Asinsé bírdug moima:pé ikang

Asinsé me:tomo:pé ipakkang

Doksiri দকচিৰি, ডিচেম্বৰ, ২০২৪