Ngasod Ayang

 

Ngasod Ayang

Krishno Dole: 

Majuli

   Karbug odokké Appun émnam ko-konéng anyiko do:lungi:dok aipé mé:mín sunamko dungai. Binyik aipé mé:mín sunamdé aipé a:né así o:ring kampé o:ring dagaboi. 

    Longékoném a:né rago ru:yidog bugori kéyigdo Appunbí ajonkí:dí:dok lédílo bugori danna du:dagdo Jongkibí kéra:pé gíya:la Appunmé luyosuddom Appunbí Jongkimé léko mikmodog pige:la ajonkí:tí:dok lédílo gídakku. Jongkibí mémít sulamala bík ba:bu do:mírmé  tadmokapé méligdag. Jongkibí murkong kané éra:lokké. Jongkibí Appunké ba:bu Takarké ajjoudokké ajon Do:mírké auo. Jongkik agom tadla Do:mírbí bík ajon Takarké omé Appunmé tatsék bidag. Odokké Takarbísin ajjoudokké ajondog agom tadla mé:pola bipé émna toriksudag. Édé agomdém Appunbí tadbeksula Karbugmé a:né rago ru:yido riksukapé gíla bík ba:bu buluk appíng agomém lubidag. Odokké Appunbí motépé dukpag botei émna kabla kabla ludag. Odo Karbugbí Appunmé miksi ri:pu bila ludag Appun no mépénam kamang. Ngo yampo nok ou-ba:bukodog gídanna kopítkapé gípé émna. Odo Appunbí mé:pola arropei no ngom ou-ba:bukolog koyén émna taudag? Émdaggom ngo mémo:dag nokképé ngo tolígyé émnamdém. Émdaggom ngo yampo toya:la du:yé no na:nyi ka:kímé gíbola ou-ba:bukolog komolang émna. Odo Karbugbí aiyé ngolu yampo gíyé émna lugela Appunbíla Karbugbí gípan sudakku. 

      Longkon ro:do Karbugbí Ané abu kumsudém Takarké okum gíbola Appunmé apong ki:ling guyépan tílígla kobidag. Takarbí opan-ki:pan émna métidla Karbugképé bimang émna aisí:ma:pé lula ménlen liktoku. Odo ayirdo Appunbí yabgo lamkudo késuksula tadla du:dag. Ménlen ligdakku ayirdo Appunbí duglenna Karbugbíla Appunbí alag alakki bugap ka:mínsula du:dagdo Karbukké oubí biman éra:dokkém la:bi:mang émna lula sopan sudag. odokké Takarbísin bimang émna Appunméla Karbugmé sopanka:mínsudag. 

    Kíníd lédílo Takarbí Do:mírmé goglígge:la Jongki:kélang Appunké Da:ro midang tombidag. Karbugbí buluk mida:dém ka:ra tarra sula:ma:la édílosin apong tí:mané Karbugbí médír méso:la apong tí:pénampé ikang. 

    Longékoném Appunbí Do:lung kéra:ké bojarpé attar rékapé gídagdo Karbugmé bojar ru:yido ríksuka:mínsula ainam aimang agomko Appunbí taudag. Karbugbísin bagémpé ríksula aturra aimang ngo, sila:ma:la turra dung émna. Nolukkémpé gasumko aín-murkong, bottané gari motom kamala. Appunbí kabla miksi titsu titsu:la ludag ngosin turra turra sila dung émge:la gípagdakkung.

 Longékoném Karbugbí ajonkí:dí:dok lédílo do:lu:dok a:né  rago ru:yido tedla du:dagdo ajon ako gípadla Karbugmé Appunmé milbo:dok démgíd démmad agomkí:dí:dém lubidag. Karbugbí appíng agomém tadamma:pé aglíng sa:la gípagda. Ajon anyidé oi Karbug Karbugé émna jé:míndag. Karbugbí apong tíngur sugela Takarké okumdo Jéngala kabla kabla Appunké milbo:dok mogíd-momad agomkí:dí:dém lubidag Appunbí amilo gíténgélé mé:dír ngasod ara:lo turge:la sila dung. Nolu aín-murkong ka:bola ngonyik ayang abu:dém gétum likto. Takarbí Aglíng sa:ma:ngopé ludag Appunké légangé ngolu dung no sokké gíkang kubong émna. Karbugbí mikei titsula ludag Appunbí kape:ké o:kai ipé émmílo nolum ka:lang dei émna luge:la gíagdakku. Karbug néng milbong anyidé Karbugké lunam agomdém mé:mí suge:la longkon ro:do Jongki:ké okumpé gídagdo Jongkibí Appunmé démna du:namém ka:beksudag. Jongki:ké démna du:dagdo Takarbí lamkudokké tukundé adgagdag. Jongkibí bérratsula kangge:la aní:sula béryoddag odokké Appunbí kabla kabla bík oukodopé dugala gomgapka:mínsudag. Takarbí Aglíng sa:la Jongk:mé léko pige:la ludag nom ngo aín-murkong ka:bola atér omébí mé:pola du:yépé émna bila bimur suto. Silo ngo kinto mírém tani:lok ayang sémpé idag émna luge:la Appunmé gíbodakku. 

     Longékoném Kerkota rago ru:yido Karbugbí atér atéré de:lum érra du:dag. Odo bík ajon ako gíya:la Appunké agomdém lubidag. Karbugbí okumpé médír mé:so:la okumpé gídakku. Okumpé gípídakkudo:do Appunmé ka:begge:la Karbugbí aturdag kapé Appunbí ngok okumso lenkan émna. Appunbí kabla dugangge:la Karbugmé gomgapka:mínsala kabmín rí:mín audag. Odok lédípé Takar néng-milbo:dé Karbukké ané-abu:dé gílenge:la Takarbí po:péké agomkí:dí:dém mé:la du:mapé kédan-kédan né:nga atér omémé ngo silo nolum tolíg du:bong émna kumpa:sula po:péké lumur gímur kí:dídém mé:yin subilang émna ludag. Karbukké ba:bu Mukkabí Takarké alagdok sogabla ludag kédan-kédan né:nga Appunbí ngo yamémang ngok ommé. Odok lédípé nolu mé:pénamé kamang émna luge:la Appunméla Karbugmé da:ro midang da:la mobidag. Édémpé Karbukké lang Appunké ngasod aya:dé ma:né rinjipé ma:pum sudakku.

Doksiri দকচিৰি, ডিচেম্বৰ, ২০২৪