SAGÍ: GÍNAM

 SAGÍ: GÍNAM

Anuj Yein

Disangmukh, Sivsagar

  Longé rokom ayirdo Langra ru:tumbí menjeg dornyidém así dolonido nésin doyepé ménnígto. Langrabí yumi:la ísíng talé:to:pé barsa:la yubkang. Odok ayirdo arang assé tésa:dungai. Bí yubge:la kono:la okumpé gígangku. Bí apin doge:la okum ager galup gasorkosin nípusuka.

      Kangra bí amiké mipag a:oko.Bí pagbopé ila: dung. Dokké Langrabí donyi:kétokdo menjeg dornyidém así dolonido nésin do:du:né yubdon ísíng talé:to ba:rsal ka:dungai. Odo bí okkomsin kapa:ma:la bí méngkang ménjeg dornyidé okolop bangkan. Odo bí ellung dumobna kangkapé gíkng. Odok ayirdo arang assé tésa: la metekang Yuri yusola ali lok bitkur así yabgo dokké abung assí:lo:pé billen dakku.

   Odo ara:do ménjeg dornyidé bitkelepla métungai.Odo Ranglabí odo bitkelep ara:do ellung dua:la ménjeg dornyidé bulenna turmopé émna abarungko dungkang. Émdaggom bí ménjeg dornyidé bulenna:ma:la tani:yém jé:la jé:la gogbegma:la bí:sin odogí meteka así:dé bitkelepla sikang.Langrangké ope tani:yé:lang do: lung taniyé édé ménjég dém lang Langrabím lo:nyi luhumko madungai. Langrangké dungko mili ope írang tani:yé buluk mipag tani írangém lutad bikaku. Langrabí kenba:pé okum gídakkunéi ? Odokké buluk okum tani: yé po:lo ara:do ménjeg dornyidé bolo así bitkur abung ru:yido gíbadné tani:yé yumang namsu:dung émna luto ompigela édé ara:dop gíala ka:mangngai. Do:lung réngamé ellung aso:do lalentoku dokké ménjeg dornyidé nasungkang émna mépakto. Odok arra:ngído Langra pagbo tani:dé daggai émna réngam kidí:dé ludungai.

  Su:sin édé Langrang tani:dok sinam agomdém pikapla buluk mili íra:do Émdaggom do:lung taniyé édé agomdém méyummérrompé léko léko kídag. Mili ope:yé sémpé méngkang édé siné Langramé agomdém tatpala kinmílo ngolum Langrangké opé:yé police sém ye:moyé, dokké bulum atí atí ui -udpong modopé murkong bipa: Édé appí:dém mérídsula posola édé agomdém lesila pikabla méto. Odokké dítag ako a:dag lédupé Langra bíkké néng ami dokké ommang angkoko dungngai édébulu do:lu:sop gíla mala kabdungai. Buluk mili opé:ye okolai sekkai okumno ager gerra dungka:pé émna yatla ludo.

  Langrangké néng ami dokké ommang ngasod kídarrok agomsém lungabéi katomang. Odok lédupé édé mili ope:lokké ngasod urom dénga:la buluk mili írra: dokké ya:mé annyiko dítag dítaglo sikang. Langrangké eji: yalo:dé sémpé dénga:la sidung émna do:lung réngamé kintoku. Dokké Langrangké opé:yé: sin édé agom kidí:dém do:lung taniyé kíngab bitoku. Su:sin édé Langrang pagbo:ké eji yalo:dé sémpé dénga:la tani: yé sipéké émna buluk konnyidé ruped gipedla ui-udpong modopé murkong nurkum sula bottapé ui:dém píde mode:la mowarém mokaku. Édé ui -udpong modog lédupé buluk konnyidé ésang ébila tani:kisa:pé okum bomna atékpé turyarkangku.

Doksiri দকচিৰি, ডিচেম্বৰ, ২০২৪