ধূলি
মনালিছা শইকীয়া
বোকাখাত
ধূলি আৰু ছাইৰ
আঁচলত উলমি আহে
দুষ্ট ফাগুণৰ নষ্ট গদ্য
তথাপিও
ধূলি উৰুৱাই উৰুৱাই
ঢপলিয়াই সকলো পথাৰলৈবুলি
ধূলিত উপঙি ফুৰে
পথৰুৱাৰ পেঁপা বাঁহীৰ মাত
সুহুৰি অথবা চেনেহৰ উকি দুটামান
ধূলিত বুৰ গৈ থাকে
এজাক চহা খেতিয়কৰ সপোন
বুৰগৈ থাকে বাটৰ কাষৰ গছ-বনবোৰ
পথৰুৱা বাট গোবাট
হেঙুল আবেলি বেলি ঢাকি
উভতে গৰু ম'হবোৰ জাক জাক
লাহে লাহে
নিজাৰ পৰে ধূলি
নষ্ট গদ্যৰ শেষৰ দফাত
এপৃষ্ঠা ধূলি ধূলি গোন্ধেৰে
আমোলমোল বৰষুণৰ আৱাহনী…
Doksiri দকচিৰি, মাৰ্চ, ২০২৫
No comments:
Post a Comment