নীলা চিয়াঁহীৰ কবিতা
সৃষ্টি বৰা
আমোলাপট্টি, নগাঁও
শীতৰ এটি কোমল পুৱা,
চোতালখন শেৱালি শেৱালি গোন্ধাইছে,
মই তাতে ৰ’দ এছেৰেঙা ছটিয়াই দিলোঁ।
এতিয়া চোতালখন শুৱনি লাগিছে জানা ?
কবিতা এটা মেলি দিছোঁ তাতে,
শব্দবোৰে উম লৈছে আজি বহুত দিনৰ মূৰত।
তোমাৰ মনত আছে নে ?
এবটল নীলা চিয়াঁহীৰ দাগ লাগিছিল
তোমাৰ কপাহী শুধ বগা চাদৰখনত ?
তথাপিও কিন্তু তোমাক ধুনীয়াই লাগিছিল !
তুমি তিয়াই মেলি দিছিলা চাদৰখন,
টোপ টোপ কৰি সৰি পৰিছিল নীলা চিয়াঁহীবোৰ !
তাৰে এটি এটি কবিতা লিখিছিলোঁ মই,
চোৱা আজি কবিতা এটা ৰ'দত মেলি দিছোঁ।
Doksiri দকচিৰি, ফেব্ৰুৱাৰী, ২০২৫
No comments:
Post a Comment