LUTAD-LUSARDÉ RÉNGAMKÉ MIGMO LÉ:PANGÉM KA:SUNANÉ

 LUTAD-LUSARDÉ  RÉNGAMKÉ MIGMO LÉ:PANGÉM  KA:SUNANÉ

Bhaigeswar Pogag

   Tani: amo:so angu angu opín kídardémpé Mising agomsém Mo:píso turla du:molai. Kapila émyemílo agom ako turra du:pé lutad lusarko lagiru:dag. Bharot mo:rumso édíko turné agomé  du:n émna taumílo 398 kíramko dung émna lulado. Odok 387 kíramko lubomsula du:nam agomé odok 11 kopé siné agomé  dung.Agom kídardém porinané agompé molama:mílo agomé turra du:la:ma:ng édém appíngéi kindag. Mising aqomsé po:pé nappang agompila dungai.Do:nyi Po:lo ka:po:né miku boku buluké mé:no:sunamki silo adnam agompé ika:bo. Sinyingké kin-go dítag 2025-26  sokké Mising agomsém lékor pobugdokké lékor angngo:do:pé porinané (Madium) agompé Mising ko:kang 100% kako iskullo poraipé émna tolíktung.Sé ainé  do:yingé.

   Agomém lubomna du:ma:mí aso aso:pé mo:písokké yokpagdo. Mo:písokké 14 longé ara:lo turné agomlok ako yokpadag émna pondit kídaré ludag. Mo:píso 7000 kíramko agomé dung émna agom makumné kídaré ludung. Ané agom kídardém Inglis, Mandarin, Spenis émpiné bottané agom kídardé aso aso:pé  Bírom Tabí metkampé metpagdag. Mising agomsigom ame:né ago mope:ko.Sém luabbomna du:ma:mílo longékolo bottané agom kídardé metpaye. Émpila kinno:sula Mising agomsém adí du:dakso mosi:péi lagiye. Léko siné agomé tursangkupé aipé ngasoddag. Lukanko-Ahom agomsém ka:mílo kinnadag.

  Mo:píso Mising agomsém 2011 dítagdok sapkampé 629,954 ko midumé Mising agom  lunné dung émna migomé lukantung. Bharot mo:rumsok ame: ame:né agom kídardém pobug posangko iskul kídardo poraidopé lubo dung. Sukké Anu Kin-go Ayon 2020 dé Bharot mo:rumsok sí:sang gí:sané  ko: ko:néng kídardém ainé kin-go kinmonam légapé la:lennam ayonko. Sé ayonsokki pobug posang dokké  lékor angngodo:pé ané agomki porai nané agompé la:pé lagiye odokké ko:kangém ané agomkokki poraipé lagidag émdung. Ané agomsém Iskul kole:jlo porainané agompé moma:mílo me:lampé ame:né agom kídardé mo:píso  turra du:lama:pé iye. Émpila sukké anu kin-go ayonlo kama: émdogom pobug posing iskul odokké lékor 8 do:pégom paglamílo ané agomki ko:kangém porainamko ipé aido émna lukantung.

   Mo:píso turné lang siné agomé bojeko dung.Siloké longesok mo:píso 6,500 kopé turné agomé dung. Édémí:pé Bharot mo:rum ara:so:gom turné lang siné agomé bojeko dung. Ohom mimong ara:so:gom bojerungko turné lang siné agomé dung. Édé turné agom kídardoksin nappang agomé:lang adnam agomé:sin dung.Siloké longéso 55 kopé turné agomé Ohom mimong ara:so dung émna ludag. Asom migomé Karbi, Dimasa, Mising, Rabha, Tiwa, Deori agomém pobug iskul kídarlo poraidopé ludung.

   Mising agomsém turra du:yarmo:pé bojeko ngasodé dung.Émdogom Mising réngamsok ka:ji mé:jí:suné abí:né kídaré Mising gomsi: gomlab labji:né kídaré Mising agomsém turmola lé:bi:tung.Sé abí:ng buluké mosi:la lé:binam agomsém turyarmopé lagiye. Édé agerdém siloké sí:sang gí:sané kídaré atpé lagiye odokké  Mising agomlok lenné potiném, lutad-lusarém réla poripé lagiye. Odopak Mising agomsé mo:píso turra du:laye.

   Taon lu:jarlo ro: rokompé gérobdanna buk émna géalígnam aduddé bé:yémílloi nokké amigdé darmo:sudag. Édé aduddé lutad olednam adudé. Lutad orné kídaré bila gíkunam  adudé. Lutaddok du:né lutad kídardém porila Mo:pí- Mo:rum, Mimong-Mo:dum, Mongke-Mo:lég do:ying kídardém kinnadag. Lutadlokké turyingé longé pétomko. Émdogom lutad kídaré lo:um, Lo:níd, Lo:ying la:ngo manggom Po:lolo la:lendag. Adíé gípagmílloi lutadlokké arré ka:kuma:pé idakku. Mising lutad lusaré lendag odokké lomdanna sipagdakku.Sé Mising agom légapé bottané ngasodé. Lutad lusar la:lenpé aíkí tujednané du:supé idag. Mising tani:lokké aíké tubjednané kasuma:la lutad lusarém mé:ngkampé la:lensulamang.

    Bharot mo:rumsok lenné lutad kídardé bojeya:pé rokompé lendag.Rokompé lenné lutad kídardém yu:lo tubjedla la:lendag. Kolikotabo bojeya:pé yumé ayirlo lutadém po:pé la:lendungai. Émdogom rokompé lenné lutadé bojeya:dag.

   Lutad lusaré kama:mílo agomé turra du:la:mang.Agom ako turra du:pé lutad- lusarém lagiru:dag. Lutad lusar kídardé réngamlok  migmo ka:sunané arsé. Édé do:yi:dém kinna dítag 1550 do  Protugali  kídaré printing press ém la:lenka. Bharot amo:so  dítag 1556 do Goa mimo:bokké Jesuit ST. Paul kole:jdo printing press ém la:lenpongka. 

 Bharot mo:rumsogom Milun(Ami:+yalun) kídaré buluké yelamém orgonam légapé printing press ém la:lenna yelam potiném tubjeddungai. Édé yelam potin kídardém Bharot mo:rumsok tani: kídarlo orgo dungai. Ohom mimongso American Baptist Missionari kídaré printing press ém dítag 1936 do Sodiya to mopongka. Édé aqgerdém gerboka Milun Asom sok migom  Captain Jenkins émnam migomdé.

   Po:pé Ru:m amo:lo Jarman Johans Gutenbarg bí 1436 dítagdo printing press dém molenpo:to émna do:yingé dung. Odok me:lam do European renaissance dokké adhunik ju:gé lenkang. Printing press ko ka:suma:mílo potin odokké lutad lusarém tujetkolo ngasoddag.Édémpiné ngasotki Mising agomsém Ruman abíkki atpénampé ikang. Kapila émyemílo Mising abíkko anguru:pé la:lenmílo tubjetko légapé ngasoddag. Ruman abígdaggom silo mélo Mising agomsé pogolok kin-go agomé. Sém ngolu yampo ro:yépé turyarmola lé:pé lagiye. Odok légapé lutad lusaré ka:pa:ru:ye. Lutad lusar kasuma:mílo agomé turra du:la:mang. Silo mélo mobailé lennangkula tubjednam lutad lusarém porin aso aso:pé yogla gídopé ka:pa:dung. Mising lutad lusar kídardé Mising agom dírbém ré:badbonané. Mising  agomlok lenné lutad lusar kídardé Mising réngamké do:pín potiné. Gomlabé lo:dípé réngamlok unnoti nané odokké opínlokké ainé bélamém lékanbonané. Lutad lusaré réngamké ainam aimang odokké réngam ara:lo du:né ngasod kídardém sutkan léngkannané.

   Lutad lusar kídardé réngamlok du:né ngasodém  do:yingém lukanbidag. Lutad lusardé Murkong, milam, kin-go-pogo, yelam odokké dírbí dírlablok ainam aima:nam, kanam kama:nam appídém ka:sunané odokké lusarsunané.Lutad lusardé Mising agom dírbílok  migmo lé:pangém ka:sunané. Lutad lusar kídardé réngam ara:lo du:né aima:né ager kídardém la:pagdopé odokké ainé ager kídardém mosi:la:dopé lukanbodag.

   Lutad lusaré baumkopé dung. Édé bulu lo:nídlo lenné lusar, Po:lo ra:dolo lenné lusaré odokké po:lolo lenné lusaré. Sém bulum mégela:sin angu angu adílo lenné lusarsin bojeko dung. Édé bulu po:lo pínnyi lenné lusar, Po:lo píumlo lenné lusar, Po:lo píkenglo lenné lusar odokké dítaglo lenné lusar potiné dung.Édé lusar potin kídardok légang kídarésin angu angudag. Ake lusaré ko:kang légapé, ake lusaré Mimé kídarké légapé,akedé sí:sang kídarké légapé, akedé agom gomlab légapé, akedé sakori légapé, akedé pési ko:ré légapé odokké bangkí bangkí légapé la:lennamésin dung.

   Sim si:ro Mising agom loksin abor bornyikopé lutad lusaré lenka:bo. Édé lutad lusar kídardém réla poriné kama:la pensam pensamlo yogdakku. Mising agom Kéba:lok la:lennam lusar potin ‘’Mimang’’ lusar pétomdé ngakí ngakíla turra du:né lutad lusaré. Émdaggom bí:sin sikí sipagla turra du:né lusar potinko. Mo:píso Mising agomsém lunné 629,954 ko dung.Odok Mising lutad lusarém 150 lakhko poriné lenbigom Mising lutad lusaré turra du:la:ye. Mising lusar potin émna lupé mé:mílo lenpopagné  lutad lusardé  “Miro-Migol’’ dé émna ludo. Lenpo:pagné lutaddé émna lumílo Agom Migang Nahendro Pa:dun sa:rké Sibsagor mo:taglokké la:lenam “Mégab” émnam lutaddé émna ludo. “Miro Migol” émnam   lusar potindém North Lakhimpurlokké Po:sum Agom Migang Taburam Taíd sa:rbí 1956 dítagdo la:lenboka.Odok me:lamdokké Mising lusar potiné ako annyiko len-yon lensonsutíla dunggom  ngasod kala bojeko turra du:la:ma:pé idag. 

   Lusar potin  kídardé advertising binané léga:pétommang. Mé:tom, Gomsar, Do:ying, Do:déng, Do:yar odokké Do:sogém adné  kídaré to:g mílígla addag. Édé buluké adnamdém poriné kídaré porila do:yingém kinnadag. Édé ara:ngí:do gyan-bigyan do:yingé du:dag. Mising agomlo:sin édémpé bojeko gyan-bigyan do:ying kané lutad-lusarém lagidung. Mising agomsém unbopé bojeko lutad lusaré pí:ramdung.

  Ngoluké Bharot mo:rumso éddíko lusar potiné du:n émna taumílo kamanggom Bharot mo:rum ara:so 300 koyam  dér-ya:pé dung. Édé lusar kídardok akedé aipé lentíla dung. Ake lusar kídardé ngakí ngakíla turra dung. Ake lusar potin kídaré ra:da:dokké sipagdung. Bharot mo:rumsok agomki lenpo:pagné lusar potindé okodén émna taumílo,po:lo píumlo lenné “Digdorson” émna lutad potindé émna luladag. Édé lusar potindém dítag 1818 dok Epril po:lo ara:do    Bengoli agomki Bengol mimonglokké la:lentungai. Émdogom Bharot mo:rumsok la:lenpo:pagné lutaddé émna lumílo “ Songbad komoudi” déai. Édé lo:nídlo lenné lutaddé dítag 1821 takkído lenpo-purukla lenné.

   Ngoluké Bharot mo:rumso lutad lusar kídarém  appi:nané aísuné émna ludo.Kapila émyemílo lutad lusarki Tani: takamké yenam do:yingém asin mé:ngkampé  lusarsula dag.

  Lujubla lupé émmílo agom ako turra du:pé lutad-lusarém lagiru:dag. Lutad lusar kama:mílo opíndok ngasodém réngamé kinnangkumang. Émpila agom ako turra du:pé lutad lusaré lagidag.

Doksiri দকচিৰি, মাৰ্চ, ২০২৫