NGOLUK DO:LUPÉ ALI A:YE LÍGANGÉ A:DO

 NGOLUK DO:LUPÉ ALI A:YE LÍGANGÉ A:DO

Nirmol Noro

“Lígangoi Líganga

Sinyingsin A:lana 

Akiém Kapila Robomdu:n”

Asiném Kapila

ukbomdu:n

  - Taburam Taíd 

Lígangé takkí dítagla a:yerung.Ali a:ye Lígangé kapésin sé Mo:píso:pé a:ma:pé du:ma:ye.kapéné taniém turra du:nam léga:pé dogoko lagidag.édé dogodém pa:nam léga:pé aríém ila ngolu turpa:dag.Mising tani kídíngé a:m arígém ila turdag.Guni amdang aríg inamdok té:pé ali, pagli, enge,íngín,ma:yong,putu,pe:ret,Lahu, tapa,alu dokké mirsi atí atí bari arígém ila donam attarém mokumsudag.édé Mising tanilok turgod turnané lambéko.aríg ísíng ila do:la tí:la turra du:né réngam kopé ila bulu arígém kapé ipé lagidagji kapiné ili ikamki imílo a:m arígé lang apí a:ye kídíngé aíyeji.gesi getorra jarra pu:po jarpoyeji édém anla  Lendo a:dolok aíké ili ikamki uyu utpongém ibom gíbomtíla dung. Apí a:ye a:m arígém inam dokki Ali a:ye Lígang sé Mising réngam ara:so lenkang.toku ato ayo siné mo:bo kídíngém urom binam.Do:nyi Po:lo,karsing kartang,ruji me:rang,Do:mír yari,do:mug dongkang bulum suttomla ipu mopusula ila gínamdokki silolo:pé Mising réngamé Ali a:ye Lígang sém takkí dítaglok Ginmur po:lolok a:pongarné Lígang longé do  Ali a:ye Líggoddag.Ali a:ye Líga:sé Mising réngam lok mé:bomsunam bottépagru:né gí:dí sí:píé.sé mé:bomsunam gí:dí í:rdí sém mépagla Mising Opínsé kapésin turramang.ngolu turra du:dag takamso Ali a:ye Lígang sémgom turyarmola du:mopa:ye sé Mo:píso.Mo:písok taniém kinmopa:ye.ngoluk kangkiném akon akon opín taniém Agom Dírbí dokki bipa:ye.lupé lumílo édé arangí:do Mising lok dogo tínggo, gélod bomlod,du:lod daklod, uyu utpong dokké ili ikamki léngkansupa:ye ngolu oko Opín lok tanié ji. Agom migang Taburam Taíd ké tayong ké adkannam mé:tom té ngolum édémíng kangkano:pé lukanna lubitung.Líga:sé kapila a:tídang.líga:sé ngolu okkon.sé bíkké "Lékoda Lígangé" émnam mé:tom sé aipag are kané mé:tomko.sé mitpansul du:né Mising réngam sém kinsumonané mé:tomko.donaméi kamang tí:naméi kamang. Lígang no kapila a:tíkan. So bí sémpé lukanbitungku- akiké ugnébém oggitsula. Betné dumdum dém berberaila líga:sém gangkípé.émdokudo ngolu kadag kamanggom aíkí asinang obom mé:bom sunam Ali a:ye  Líga:sém kapésin ga:ma:pé du:ma:ye.

Aroru:pé ngolu Mising tanié Mílo.Mising Opín komílo kapila ngolu Dírbísém yogmoyen. Kapila ngolu mitpanyen.

Ali a:ye Líga:sém kétagsula ngolu Mising réngam ké lagiru:nam gasum agom do:yingém pa:ladag léngkansuladag. Kapéné Ali a:ye Lígangém ga:dodo po:pé lendag Mising Agomé.Mising agomémong ludodom Mising Agom sé turdag.dokké ako akopé lesson leyonla lenla gídag- Oi Ni:tom, Lo:le ni:tom atí atí débulu.Gumrag maksong so:nam. Aíké gégo bomgoki dakor korkamínsudodém Mising bédu gasor attarém léngkansuladag.uyu utpong molod ili ikam. Leke mannam attar dum dum lu:pi,lé:no  marbang atí atíém yomoma:pé léngkansulanam.du:lod daklod, dolod tí:lod takamém Ali a:ye Lígang ga:yemílo ngolu léngkansuladag.dépila ngolu Mising gí:dí sí:pí Ali a:ye  Líga: sém ga:ma:pé du:lamang. Sém ga:ma:pé du:mílo ngoluké Mising Dírbí  sé sidé mo:pí amo:sokké yogpagye.mirém rémné írgíbné Mising Dírbí sém ngolu kapilalai simoyen Agomé yokmílo Dírbíé yogye Dírbíé yogmílo Mising Opínsé:gom yogye édé kinnam agomé.no ngolu turra du:dogom Misingé émsupé anyi:supa:ye. Kapila:né émmílo no ngo Mising tanige:la  Mising Agom lusuma:mílo aíkí Dírbísém bomgabsuma:mílo aíké ili ikamém igab gígabsuma:mílo okolok Mising tanikopé ila turra du:yen.turra du:dogom oko aré kayen. 

Ngoluk Do:lu:lo:pé Ali A:ye Lígangé A:do: Ali a:ye  Lígang émyemílo Mising takam tani éi asinang obomsudag.asinang obom sunam ko dung du:rung. Kapéné toku ato ayo kídíngéi lekelok ké:bong Ali a:ye  líga:sém igé gígébola gítag. Ato ayo ké ibola gínam sé Ali a:ye  Lígang sé aipagpé o:rí:né lukéng kadag o:rí:né lukéngé a:la dung.lekelok toku ato ayo kídíngé kapé a:m arígém ilen gílenbokan.oko Lígangé arígém ipé ikan édém lukan pénamkamang.takaméi kindag  ngolu dola turra du:nam léga:pépag arígém ido. Ato ayo kídíngé arígém iténg arangí:do ainé Dírbíém gílenboto.aríg idula dírbí bírnam moman so:maném ibonam édé igod kídíngé silosin du:yartíla dung Mising do:lung do:lu:lo.Mising réngam ara:lo. Dépila  silo lo:pésin Mising do:lung do:lu:lo Ali a:ye Lígang ganamém ngolu kapa:tíla dung me:lampégom ka:pango:tíla du:ye.  Ali a:ye Lígang a:ye bomílloi  ya:me mímbír lok asiné mé:poki simatla usa:dag. Lígang ga:nam léga:pé.so:yir moyirsudag. Bédu gasorém sumso mososudag. Ni:tom  moyir sudag Lígang longé do ni:tom monam léga:pé.édé ayir do sí:sang ya:me mímbír kídíngé ayang akun kunmínsudag.mímbír kídíngé aipé mé:nam mé:bomsunam ko:dém Mibu galug manggom érkogém sumge:la bimínsudag . Ali a:ye  Lígang dém lugé:la Ali a:ye  Lígang dém kétagsula ya:me mímbír kídíngém asin ayangém bikamínsudag.akoné akonémOi ni:tom ki moker ka mínsudag aipé mé:namké ayang pa:nam léga:pé.  édémpé ngoluk Mising réngam ara:lok do:lung takamlo mé:po ménganla Ali a:ye  Lígangém ga:tíla gídung. Do:lung tani takamé Ali a:ye Líga:sém borígsula  takkí dítaglok itíbomla dung itíla du:ye.

Doksiri দকচিৰি, ফেব্ৰুৱাৰী, ২০২৫