YAKEBNÉ TANI

YAKEBNÉ TANI

Jawaharlal Mili

   Ménnyíng konnyíng ké do:yíngé. Do:lung akolo airu:pé tolo-bolopé tadgénam mirémné tani: ako dungai. Bík aminém ta:to Talíng émtagai. Ta:to Talíng mé odo ayirdo mirémné tani: kísa:pé tadgé-ménggé sudagai. Ta:to Talíng ké sitté, menjeg, so:bo odokke' a:m kumdung so:nyi soumko la sonduglo aín-murkong bojéyangko dungai. Ta:to Talíng bí mirém rémpotsudaggom aín-murkong méyegla éra:dok né:ng ommangém kinam ramnam a:lasin murkong méyégla kinam ka:mala sipaggam moto. Do:ludok tani:é murko: narpéké émna mé:la bí atér atéropé agom atí kosin amikokki luposuma:pé , ajon arum ka:ma:pé duksu-duksula atéro:dé du:dagai. Ta:to Talíng bí airu:pé aín-murkong méyegné yakepkebné tani: kai. Murkong gípéké émna mé:la bí ainé adin ongo kosin réla donam-tínam odokke' ainé bédu-gasor génam-bomnam atíkosin résumangai.  Longé yumé pé bí aín-murkong, sitté, menjeg mosíngola du:douém édílosin imongéi kamangai. Aso: aso:pé míjí-míjíla jíngkuragla gídungai. Atér-atérpé méngkíd mé:mítsula doma: tí:ma:pé asi o:pé ongala gíngkérép kérépla alongo:pé iyangkang. Ta:to Talíng mé sé:kosin mosíng ka:síné katomang. Ajon arumésin ka:mala bí sidí ayirdo atéré rongam pésampé du:dungai. Do:ludok tani:é bím sé:kosin pékalai ka:nésin katoma. Édémípé silo-silo yampo-yampo adí gítíla gídubo. Sidí ayirdésin aninpé pínga-píngala gídubong. Ta:to Talíng bí kéno-tí:lí pínna do:lí-tí:lídaggom dopa-tí:patokumang.    Okumdo bí atéré aín murko: sondugdém kebbomsula tayé yési nambutsula dungkang. Aki:désin doma:tí:mala sakkeb sakrebla gasor galug kama:la síkír-símírra sipakkang. Ta:to Talíng ké sima:dém do:ludok sé:kosin sopag ka:nésin katomang. Bík sima:dé okumdo nambutsula dungkang. Ta:to Talíng ké sima:dém tapum tayíngé pumna okum taléngí:do sankuragla dungkang. Ta:to Talíng bí sidí ayirdo yakeb kepnam mé:pasulangkula airu:pé mé:dírsulangkala méngkintoku. Émdaggom adídé gíbadla bí sidí ayirdo airu:pé ngasod a:la sipénampé ikang.  Ta:to Talíng ké sité menjeg, aín murkong ,a:m kumsung atí atí kídí:dé émmumpé du:pakkang.  Ta:to Talíng ké do:déng dokki Ngolu arang agomdém sémpé kinto " Aín murkong atí atí atta:r du:daggom édé bulu émmumé. Tani:é tani: kísa:pé turra: du:mílo odokke' réngam lédí:lo géla réngam léga:lok ager germílo sidag lédípésin réngamé mitpanpélang. Édé atí atí bojerungko atta:r kídí:dé sidí-turdí ayirdo agom lubimang. Turra: du:daggodo ngokké bíkké émna lusuladag. Ajon arum odokke' réngam léga:lok ager gernamdé aín murko: démyang dérboya:né.

Doksiri দকচিৰি, ফেব্ৰুৱাৰী, ২০২৫