মোৰ ধাৰণা আছিল
পাপু মজুমদাৰ
নগাঁও
মোৰ ধাৰণা আছিল
জীৱনটো হয়তো
এনেকুৱাই
কিছু পোৱা-নোপোৱা !
প্ৰেম আৰু বিচ্ছেদ
মন বেজাৰ,
কিন্তু
মোৰ ধাৰণাবোৰ ভুল,
হয়তো মইও !
মই মোমায়েকৰ ভৰিৰ
জখম দেখিছোঁ,
মৃত ছালে বীভৎস হৈ যেন
চিঞৰি কৈ আছিল--
‘দুখৰ সাগৰত ভাহি গৈও
যদি হাঁহিবলৈ পাৰা
বুজিবা
তুমি আংশিক সফল হৈছা’....
জীৱনটো আচলতে
অদ্ভুত, বৰ বৈচিত্রময়
পোৱা-নোপোৱাতকৈও
জীৱনৰ ব্যপ্তি যেন সীমাহীন!
জীৱনটো কবিতা নহয়,
ছবি নহয়!
জীৱনটো কি ?
কোনে সঠিককৈ ক’ব পাৰে !
পৰীক্ষাত একেটা প্ৰশ্ন
চবেই সমাধান কৰে,
কিন্তু
জীৱনে সকলোকে ভিন্নতাৰে
উদভ্রান্ত কৰি তোলে,
সেয়ে, সীমিত কিছু
ধৰাবন্ধা শব্দৰে
জীৱনক চিত্রায়িত নকৰিবা!
জীৱনটো কি ?
দাপোণত বিচাৰিবলৈ চেষ্টা কৰা !
Doksiri দকচিৰি, এপ্ৰিল, ২০২৫
No comments:
Post a Comment