Iki: odokké Gadho-ké Pagbo Gínam

 

Iki: odokké Gadho-ké Pagbo Gínam

Yoksa Kuli

  Lekkem iki:bí témpí simínlok dortaya:né émna sitédok lédulo pagbopé dungngai. Édémpé du:dodém bí sé:komsin pésomangngai. Longékoném sitédok lédulo sí:lu:pé gídungai. Odo bí gag-gagaila rato. Édémpé rayoka émna sitédé luto .Sumyobí tadbegmílo bím gampéké émna:sin lubito. Odo iki:bí méngkang – “sitéméyam pakkíya:né sumyoko du:mílo ngo kapila sitésok lédulo Pagbo gíla du:yen ? Édémpéyam sumyodok lédulo du:namdé aiya:yé.”

  Édémpé mé:la iki:bí sumyoké lédulo du:mínto.

  Longékoném iki:bí sumyoké lédulo apta gíkolo gímíndungngai. Édémpé gímíndodo iki:bí airu:pé rato. Odo sumyobí lukang — airu:pé bottépé rama:péka. Tani:bí tadbegmílo nom appedéké. Odo iki:bí lékoda méngkang – sumyomémpéyam pakkíya:né tani:ko du:mílo ngo sumyosok lédulo kapila du:yen ? Édémpéyam tani:ké lédulo du:namdé aiya:dag émna mé:la silolo:pé ikiyé tani:ké lédulo dungkang émdag.

   Iki:bí tani:ké lédulo du:dodém gadho-dém ka:pa:suto. Bím tauto – no kapila tani:ké lédulo du:pénampé ika:n émna. Odo gadho-bí lulatsuto – ngom sidumbí airu:pé goksudagai, tani:ké kéra:lokké duglangkui émna. Émpige:la tani:ké agom apirko tatpa:sula ngo dugpagla:tokumang. Ngo dugpakkupé émna iddardo tani:bí bík kangkano:né né:dém luto – no rokompé darobla apin-oyíng moma:mílo, ato-ayo, yígo-yígné, omma:ngém kangkanpé mosí:ma:mílo, lotta- kítígém naré:pé pétpu:ma:mílo sé gadhosok  yamnépé nom bipagyé.

  Édém tadbola ngo (gadho-bí) silolo:pé tani:ké lédulo pagbopé Ila dung. I:d-étsang kinsuma:pé tébégné atta:rém jo:tíla dung.

   Édémpila silolo:pé iki:bí:la: gadho-bí tani:ké pagbopé ila dungkang émdag.

Doksiri দকচিৰি, জুন, ২০২৫