A:NÉKO DUNGAI

 A:NÉKO DUNGAI

                                Mg. Bhobo Dole:

A:nésé rongngam-pésampé atérdé dung

Rokomdok rémagné do:nyi gadudém bomla

Ongo-opuné  mé:po mé:pola 

Simad maddung

Simad maddung.

A:nésé rongngam-pésampé atérdé dung

Mímbírko pígodo da:li pimpud mola ba:mandolo

Ya:meko tu:tog muddung

Ya:meko tu:tog muddung.

A:né boggosok sulli mo:mi:do 

Gírgum pétangé réyonpé dé:ran randung 

Gírgum pétangé réyompé dé:ran randung.

Do:si pi:riye, ki: komballiyé

Dé:pin-dépong motaksula mé:podung

Dubori dégmígla so:mandung

Dubori dégmíla so:mandung.

Mo:tum go:norbí: kortag tagla tagla 

Sí:lung gompodém  donge: ngomdung

Sí:lung gompodém donge: ngommodung.

A:né ragodo so:bo-menjeg amírdo

Do:mír ma:pí:dung Kampon kampu:bí

Do:mír ma:pí:dung Kampon kampu:bí.

Do:mírtok Kampon mukka:tém

Nge:sa nge:sa:la ka:ladung nobílíngé

Nge:sa nge:sa:la ka:ladung

Nési-néyangé 

Nési-néyangé.

Pétu appuné  gelubla kangkandung

Turnan ma:nying légo éddíng dung

Turnan ma:nyingé légo éddíng dung.

Pémí-pékamé sérmi: sermígla apta gídodo

Ongo-opuné  pékong ngundung

Ongo-opuné pékong ngundung.

E:né sé:bomna ísíng réngke:do

Mé:pol ni:tom modolo  

Do:lo miksi díla

Kaptag-ri:tagdung

Kaptag-ri:tagdung 

Mílong péttangdé mimag modolo

Do:nyi owala yumdéng a:dodo

Tangkí mari:yé mí:dum dumdodo

Po:sum uromém tosag bidung 

Po:sum uromém tosag bidung

_______________________________

Do:si piri - বালি টিপা চৰাই, Mílong - দেউ পক্ষী, Pémí - চিলনী জাতীয় চৰাই, ছাই বনৰীয়া পাৰ জাতীয় এবিধ চৰাই, Mo:tum go:nor - ডাঠ হাবিত অকলশৰে থকা এবিধ কুৰুৱা, Gírgum - পৰঘুমা,ছাই বনৰীয়া পাৰ জাতীয় এবিধ বনৰীয়া চৰাই, Dé:ran - পাখি মেলি উৰা, Mo:mi:do - বালিচৰ, Sermi: - এৰালি বন, Kampung - বগলী, E:né - শেন

Doksiri দকচিৰি, জুলাই, ২০২৫