শীত আহিছে
যতীন মিলি
তুমি অহাৰ উমান পাই পকা পাতবোৰ চকুলো হৈ সৰিছে।
লঠঙা গছবোৰত নিয়ৰৰ ফুল ফুলিছে।
অই নিঃতম এটি ওঁঠত লৈ
অবিৰাম বৈ থকা
নদীখনেও উদঙাইছে শীৰ্ণ শৰীৰ।
মহাশূন্যৰ ঐয়াঙে-দৈয়াঙে সৰাপাতৰ দলিছা পাৰি
শীতে আয়োজন কৰিছে নিয়ৰ সমাৰোহ
ঢেঁকী-উঁৰালৰ ছেৱত প্ৰাণ পাই উঠিছে
চহা মানুহৰ প্ৰেম-মাটিৰ নিটোল গান।
নীলিমাকাশত জোনটিয়েও গাভৰু তৰাজাকৰ সৈতে সপোনৰ ডিঙা মেলিছে।
এসাগৰ কুঁৱলিত ভিজি গৈ প্ৰেমালাপ কৰিছে
এটি বিনীত পুৱা বিচাৰি
কুঁছিমুছিকৈ বুকুৰ অভ্যন্তৰলৈ সোমাই অহা
শীতৰ সন্ত্ৰাস আৰু উত্তাপৰ বন্ধুত্ব এতিয়া জুইৰ স’তে
ৰ’দৰ স’তে মিঠা আলাপ মিঠা আলিংগন।
Doksiri দকচিৰি, অক্টোবৰ, ২০২৫
No comments:
Post a Comment