শেষত মাথো শূন্যতা
মেঘালী গগৈ
এই যে বহুত কথা পাতিম বুলি
কথা দিয়াৰ পাছতো
আমি অকাৰণতে নীৰৱতাৰ নীড় সাজিলো
আৰু
মৌনতাৰে মোহনীয় কৰি তুলিব পৰা
ক্ষণবোৰ নষ্ট কৰি কোলাহলেৰে ভৰালো
তাৰপাছত সময়বোৰ বৃথাই খেদালো বুলি
আক্ষেপভৰা হুমুনিয়াহ কাঢ়ি থাকিলো
আচলতে সেয়া
সময়ৰ সৈতে ফেৰ পাতি
জিকিব নোৱাৰা কিছুমান যুদ্ধ।
সময়ক আমিহে জনাওঁ প্ৰত্যাহ্বান
সময় নিজা গতিত নিৰ্বিকাৰে চলমান
নিৰুদ্বেগ সময়ে কালৈকো ভ্ৰুক্ষেপ নকৰাকৈ
আপোন বাটেৰে গৈ থাকে অনিৰ্বাৰ।
মোৰ হাতত সময়ৰ এটি মুদ্ৰা
ইপিঠি সিপিঠি লুটিয়াই বগৰাই
আৱিষ্কাৰ কৰো
শূন্যতা
মাথো শূন্যতা।।
Doksiri দকচিৰি, অক্টোবৰ, ২০২৫
No comments:
Post a Comment