AMÍR-AMO KIN-GO

AMÍR-AMO KIN-GO

Mg. Bhobo Dole:

        Karpunpuli pobug pogo dok poyirné annyidé poraila du:dodo po:péké lélum légla amin tadgénam Karmugbí gíadung.Karmug-ké gíanamdém poyirné annyidé kinsumangai.Mé:po méngandopé ko:kangém poyirla dungngai.

         Apin oying yí:biné Néngan Kulibí gíala pogo ru:tum Dole: migomdém lupa:dung.Tani: ako nom ríksupé émna toya:la dung.Yabru:dok ru:tumdé nge:lenna ka:dodo Karmugmé ka:pa:to.Bí gílenna kumríksula pé:le ara:pé gíabodung.Ko: Ko:néng appí:dé dagrobla kumríksudung.Bí:sin kumríksuge:la bulum tettoka émna ludung.Odokké ako annyiko kangkinsumodung.Ako annyi:la aiyo:pé aíké amindéméi lula:tomang.

         Bulum kangkinsumoge:la Karmug-bí kangkinsudung.Bím pogo ru:tumdé kangkinsubodung.Kangkisubododo bí lubidung- Bí aipé lélum légjo:dungngai.Bík légnamdé aipé ka:podungngai.Bí tadgénam lélum légjo:né tani:Kai.Bí nolum AMÍR-AMO KIN-GO do:yingko kíbikapé gídung.Nolu mé:mi:la tadgaptoka.

          Karmug pé:gubí koyem koyemna AMÍR-AMO KIN-GO do yingém lusa:bomka.Amír-amo aimopé ainé ainé biyamko ipé lagiyé.Porila du:dodo yummi:mílo darobla mo:ropé gílenlígmílo yummi dé:pagdag.Rouém rokompé darobla lambé gípé lagidag.Édémpé gímílo ékér ésa:la du:do.Édémpé luge:la ako annyiko biyam ibodung.Appí:dé imíndung.Asutko idag lédulo ko:kangkídídok ako ludung ménggésunam ngolu lo:dípé rokompé darobla lambé gíye.Biyam moye.Ajoda ludung ngo:sin lo:dípé darobyé odokké lambé gíye.Biyam moyé.

          Karmug-bí ludung-Aíké ékérdo kinam ka:nédé aíé.Biyam imílo kinam ka:ném lagimang émna lupa:suge:la gílendakku odokké ko: Ko:néng kídí:dé dagdí:la kumna mélígdungku.

Doksiri দকচিৰি, নৱেম্বৰ, ২০২৫