TAPUM GASOR
Rahul Sondi
Mising tani:yé airu:pé ansí:né tani: ope:ko. Dírbí-dírlablok bulumyam mirémya:né kamang. Buluk ilod-gílod, gélod-bomlodé, dolod-tí:lod, ili-ikamé airu:pé mirémné tani: réngamko.
Mising taniyé gadu, egé-gasor sumkamí:pé tapum gasorémsin sumdag. Mising taniyé lekelokkébong kindagai tapum lok onnom la:lendag émna. Lekelokkébong ta:to-ya:yobulu tapum gasorém aíé sumge:la gélen-bomnen botung. Po:pírém sogab ge:la appém ummoge:la tapumém onge:la onnom la:lendag odokké takpínlo pínllígge:la po:pi kokki kédag. Kélennam onnodé tapum gasor pangkoko ibo:míloi mograng ki kége:la pa:tabge:la ra:siboruwangki ra:sido kenga:lígge:la su:riki íkkodag. Su:ri:do níkkogge:la tulta:do yellígdag.
Tapum gasorém sumpé manggom egé-gasor sumnapé abarungko sumnané attarém lagidag. Édébulu sémpé :- Mograng, Makung, Tultang, Durpoti, Sangkog, Ra:si, Ra:siboruwang, Kunti, Yapa, Bo:sunga, Tangnge, Su:ri, Taí, Gubong, Nasoni, Oli:ma:ri, Nasoni ríbí, Jokolang, Dag ma:ri, édébulu.
Tapum gasorém dígín po:lolo bomya:dag. Tapum onnom geropé iskappé, ege jurpé mibo galukpé, lugro galukpé, coat pésin siyumsí:ro omge:la gédag.
Ngoluk Mising sumnam tapum gasorlok gamigém amiké opíné langge:la bulukké opíném mo:písok angu angu tani: opín ara:lo léngkansunadung.
Ngoluk opíné aso: aso:pé tapum gasorém sumtoikuma:bong. Okolai okolai ako-aru: ané ope: lok sumnamém ka:begdag.Odokké siyum sí:ro se:kosinnei tapum gasorém sumkintokuma:bong.
Doksiri দকচিৰি, নৱেম্বৰ, ২০২৫
No comments:
Post a Comment