Asrom

 

ASROM

Bhaigeswor Pogag

   Lo:bo po:lo é . Ngangín bí ateré karédo kédmanna du:ng.Do:mírtok takar kídardém ka:la mé:mi:la dong. Ami:ké karélo ko:kang ru:ru se:sela ato ayo kídarké lubonam leke do:ying talla du:ng.Nga:ngín bí mé:dír mé:sola dung.Yakari bí atér karédo okkom mola dun émna tauto. Agom lukutsuma:pé aso:pé okum ara:pé gíatoku.

Lo:ngé kolo bí mé:ngkang –‘ sémpé du:tomílo aiyelang?Yampo ro: éjo: mí:ji:la gíyépé. Sé:ko ka:si mosi:yen?Tuptasi omé ao: migmoko ka:pénamé katomang.Asromkologé ko: ako o:sa:pé lagiye.’ Édémpé mé:la Yakarimé asin do:ying kídardém kíbito.Yakaribí lukang-‘Pa:mílo aipéi aidag.Silo mélo ope: buanglok upé émna ludogom bisulí:mang.Aíké ope: buanglok omé ao:ko du:boyamílo aipéi aiyapé.’Ngonyikké yogrongém among arígém sé:ko ka:si mo:siyekun?Agomdém yakaribí Nga:ngínbím luto.

Longékolo Gua:tibo agerko kala Nga:ngín bí Guati:pé gíto.Oddíng asromko ka:pa:la gía:la asutko du:rasuto.Asrom malígdé bím du:ra:sudopé Masuangko bito.Bí du:rasula dungko:ídok ko: kídardok so:manna du:namém ka:la dung.Asrom maligdé Nga:ngín bím kangkinsuto.Nga:ngín bí Lakhimpur mongkelok Mongku do:lu:dokké émna lubisuto. Bínyi asin tolíksudanna do:ying kíbosula dungkang.Bínyikké mé:dír mé:po do:yingém kíbosuto. Do:yi:lok do:yi:pé Asrom dok ko: ako: pa:mílo ao:pé du:bokupé émna luto.Ngokké omé ao: kamang. Odo Asrom malígdé ko: ao: bipé émna togésuto. Asromlokké oko oko ayoné kadu:ji appídém Nga:ngín bím lubito odokké laginam kakodém mo:gela bím Mé:bom émnam ko:dém bíkké ao:pé bito. Mé:bom bígom abuko pa:la aipé mé:pokang.Mé:bomké anédé amil gíma:da:pé okumdo ola ammem kinmo:ma:pé bipaktungai.Ngangínbí Mé:bombím okumpé gíbotoku.

Adí gíkam gíkampé Mé:bombí yame:ka:bo.English ki Em.E(M.A) pa:sla Kole:kolo prinsipalpé ika:bo.Abudém bím bottapé da:ro mida: mola yameng langa:bito.Nga:ngín bí L.P Schol mastorai.Bí ritarkabo.Minédé sidokké okumdo atérong du:pé idag.Yamé:dé Nga:ngínké bédu gasor kídardém níbipé bélímdag.Do:lung membarpé ila okumlo dungangkumang.Émpila ager gerné ko:nédém germodag.Okumlo miné mí:jíng du:yemílo dolo olopé gigolo:mang.Émpila Mé:bombím Nga:ngín bím bidro asrom kolo lé:dopé Mé:bombím luto.Mé:bom bí abudém asromlo mélí:mangai.Émdaggom Naséngké agomdém yoppag la:ma longékolo asrompé abudém gíboto. Abudé:gom aiyepé, nolu amonipé mé:dagmílo émna lukang. Ané abu:é lo:dípé ao: ommangé mé:pola du:dopé ka:lídag.Aíé gabdaggom ommangém gabmola mé:límang.Aíké mé:dírém lé:sila lé:dag.

Mé:bombí Guati gíté:la abudémgom gíboto.Asromkolo gíalíkto.Abudé:lang asrom malígdé asé:la yirla yirla luposula dung.Ao:dé asin mé:dírra asutko mo:té:pé gíér dag.Ka:namé abudé asutkosin mí:dírmang.Édílokkéboi ríksunam kangkin ajon kísapé asrom malígdok lédulo luposula dung.Édé luposunamdém ka:la Mébombí gíala maliígdémtauto-Ba:bumé po:pé kangkindagné?Odo asromdok malígdé lukang-‘ É,Nokké abusém dítag 40 po:pé kangkítag.Bíkké ommang kama:la ngokké asromsok dítag akoné ko: ako gíbokanga:kui.Édé ko:dé no:íngí: ma:lang?Agomdém tadla Mé:bomké mittubdo bottané ílíngko ogaptoném ikang.Agomdém tadgela tettula: dungkang.Asrom malígdé lukang Mising tani:é ané abuém asromlo lé:namém silopé tatkímang odokké kangkísinmang.Nokké abué aíé doma: tí:ma:pé nom bottapé poraito.Migom agerém la:bito.Yaméngém daro mida: mola la:bito.Supag sidí-yogdí ayirso kapé asromlo lé:pé mé:ngkan?Aíém a:ngké pigapsula tausukítoka.Mising dírbílo ao: ommang kamanggom ope: buang ommangé ka:si mo:sido.’ Agomdém tadgela lukang-ba:bu ngom,mé:murpé mé:yoka.Nokké yaméngé luga:lok ngo asromso lé:pé émna gíbo:tungai.Silo kídar ba:bu nom atí mé:dírém mé:mokuma:bo émna lugela okumpé gíbotoku.

Doksiri দকচিৰি, অক্টোবৰ, ২০২৫