AÍN AGOM

AÍN AGOM

Mg. Prosanto Kumar Pa:yeng

   Asin tolígna mé:yemílo aropéi ngoluké Mising Agomsé aín to:lu:ru:sunamko. Sém lubegma:mílo atí atíkoi ludogom aí kadopé lutonémpé mé:sumang. Dépinangéi Ngo duroblokkéboi aíké Agom Misingki lupénamém lurobdo. Néng-ommang, Ané-Abu, Angé-Bíro, Yigo-Magbo, tadkinné ajon arom kídarém aginpé Mising Agom logéi lupo mínsula aipé mé:podo; bulum tolo bolo gídodo aíké Agomki luposupa:na angu mo:léklo du:dogom bojeko mé:dírmang .   Dépimanga:mílo aropéi kapéi iya:song édém lupongéige:ma:bong. Silo-mélo angu tani: asagém gom aíké Agomki luposudo. Lupé luyemílo sungken sungrenlo du:né bojerung taniyei ajjong-attíné kinma:pé  Mising Agomsém aima:pé mé:né kamang. Dépidowém Mising tani: lusuné, Mising opín tosuné akon akoné ajjong-attíné kinma:pé Mising tani:ko émna lure:luse:péké émna pésonamki aíké Agomém sungkenlo síngkeppé manamko ka:patídag. Édé tani: kídardém pu:koré dopé lagidag kapé ímyemílo Mising Agomém kin-ge:kunasin kinmango:némpé angu Agomki luposuyemílo aropéi jubma:né do:yingé.

Silo ya:yangé yampo ya:yangé ngoluké Mising Agomsém ojíng-sí:sang, ya:me-mímbír, é:jo-míjíngé írga:pé borígsuna aki: kilígsuna dígbomsuna ngírrob bomma mílo anguru:pé Se:di-Me:lo, Karsing Kartang, Ta:to-Ya:yo  bulu lékoda gírob-dagrob, luyir-ka:yirboye émna mé:mílo ma:nyi:lo murkongém típa:la pa:tungai pogrobla kinsukunamé taléng amo:so émmímla ring-gosula kabgo:la  du:namém piné do:yingé. Dépina aíké Agomém, aíké Gomug Gompirém nérkíkpé bomgabpémílo édílo:sin sigodé kama:ye. 

  Kinné-pa:né bojerung Tani:ékké ka:namé buluké ommangém Mising Agomém tolo-bolo gídolo lunamém méttoibongka aíké okum lo:goméi édé aín Agom Mising dém bapagdung. Kapiné agomén édé ? Kapina bím bapakpé mé:du:n akon asagé ? Édé Aín Agomdé íngkolok aima:namko kaka:n ? Mising Agomém lukin ge:nasin lukin ma:némpé pakkan-síkanné tani: kídardém íngkoko lumílo aí kadopé luníngém lutékla lula:yen ? 

  Aíké Agoméméi luma:pé kapé aíké Na:nmé airu:pé aipé mé:dag émna lusuyemílo aré kayelang !? Na:nmé aipé mé:dagrung aroru:pé asin tolígdanna émyemílo aíké Aín Agomém asin tolígna kinbompé lang lurob bompé dolung, sohor, lu:jar, bojar, iskul, Kolej, Office, Hospital, uyu-utpong,midang, birthday, arík-ísíng, okum-ríng-ngong lo:bulu aíké Agom logéi luposulamílo aidag.      

    Adjub-adjarjo:né, mé:jub-méngkinné, adjo:né Migang, Mitom kídaré Agom gompirkokki   pedat peratpé Mé:tom, Gomsar, Do:déng, Do:míg, Gomsiri, Do:yar, Do:tur, Lusok soknam, Bottén ammem Misinglok tau lupomínsunam atí atíki mirém rémbopéné kídaré Ngo, No, Nolu, bulu odum osetsula appíngé mé:mi suge:na irroiya émna dakorém korren bommílo Se:di-Me:lo, Karsing-Kartang, Gu:min-So:ying lang Ta:to-Ya:yo bulu íngkoloi du:dogom buluké ayang miksiki sé Ngoluk mé:bomsunam Agom “Aín Agom Mising” sé mo:písé du:dolo:pé du:mín géyépé émna luna:dag. Démílo kaje: totédyobong, lédu mokutsuyobong dakorém létélkopé korrenlai.

Doksiri দকচিৰি, জানুৱাৰী, ২০২৬