ফাগুন কেনেকৈ আহে ?
হৰেন কপ্তাক
ফাগুন কেনেকৈ আহে?
মলয়াই ক’লে-
সৰাপাতত উঠি
ফাগুন কেনেকৈ আহে ?
কাঠ শালিকাই কাণে কাণে ক’লে-
শিমলু ফুলৰ আঁৰত লুকাই
ফাগুন কেনেকৈ আহে?
ৰিবি গাচেঙে ক’লে-
কঃনৗঙৰ তাঁতৰ শালত
লৃগাং বুলীয়া নাচনীজনী হৈ
ফাগুন কেনেকৈ আহে?
মুৰংঘৰে ক’লে-
আবেলিৰ ধূলিয়ৰি বাট গচকি
গুমৰাগৰ সুৰ এটি হৈ
ফাগুন কেনেকৈ আহে?
হাবিয়নীৰ তৰাপাতে ক’লে-
টোপোলা বন্ধা পুৰাঙ আপিনৰ
আমোলমোল গোন্ধ এটি হৈ
ফাগুন কেনেকৈ আহে?
মেগেলা বনে মাত দিলে
মিচিং গাঁৱৰ ঘৰে-চোতালে
গুমৰাগৰ ৰহন সনা
য়াবান, কাবান অই-নিঃতম এফাকি হৈ
ফাগুন কেনেকৈ আহে?
গাঁৱৰ দুম্ব গাঃমে ক’লে-
পঃৰ নগিনৰ নিচাৰ ৰাগিত
ইমূৰ-সিমূৰ লঃলে নিঃতমৰ মূৰ্ছনা তুলি
ফাগুন কেনেকৈ আহে?
কঃনৗংজনীয়ে ফুচ ফুচাই ক’লে-
মূৰত টঙানী মাৰি
ক’লা বৰণীয়া মিবু গালুগ পৰিহিত
বৰ ডেকাটি হৈ
মুঠৰ ওপৰত ফাগুন আহে
লৃগাঙৰ বুকুচাত উঠি
Doksiri দকচিৰি, ফেব্ৰুৱাৰী, ২০২৬
No comments:
Post a Comment