Mimang

 

Mimang

Krishno Dole:

   Mo:píso turnapé Murkongko lagidag. Murko:ma:mílo lo:nyiko turdakso oko agerémsinei gerra:mang. Mo:píso murkodé bottaya:né atiyaré. Kapéné murkong du:mílo gerpémanam agerémsin gerra:dag. Murkong du:mílo amme:sin mé:tin sudag. Murkong ka:ma:mílo sé:kosin tani:yé émna do:yingémei kímang. Sé: do:yi:sé arro do:yingko. Majuli amo:lo mongko do:lu:dok Gomuk kéla Karsangké do:yingé. Ngok amik sokki ka:sunam do:yingko. Gomukké néng Dérmi odokké ao karsabí mé:po mé:nganna okum bomna dola dungai. Gomugbí aríg ila amikolo ager gerné tanyi:kai. Émdaggom édílosin bík ao karsang odokké néng Dérmímé amikolo ager gernépé du:mo:mangai. Ngasodé okkon édílosin kinda:mangai. Karsabí okkomei mayéji  édémei bila murkong ngasodém karsabí Kinto-émang. Karsabí 30 dítakkopé ya:me me:la ajonlédílo mé:po mé:nganna dungai. Karsabí okodémei mayéji édémei monin subidagai.

         Longékoném Gomugbí bottané kimanko a:la okum arangké soraido turnam légangé Kabgo jénggo:la dungai. Gomukké kabnam tadla Gomukké néng Dérmi odokké ao karsabí murkong léga:ngé bojéko ngasod a:ngkang. Odokké amikolok ma: murkong kosin mago:lasin pa:tomang. Sé:ko biyé? Murkong malennédéi kinamé angkang émna appídei bimang. Karsabí mé:díré, bojéko ngasod a:daggom édílosin amik miksi dímoma:né ru:nékémpiné ba:bumé aín-murkong kama:la ainé bottané hospitello kinam ka:la:ma:pé ila Karsabí mé:dír miksi díla kabdung. Karsabí bík ba:bumé mé:tín sula murkong mosí: supénam agomdém mé:píngei-tomang. Génam bomnam appíngém bík abu gomugbí monisubidagai. Odokkídípé Aya:né ba:bumé kinam ka:la:ma:nam agomdém Karsangké asindé taréko kakang. Odokké édílosin mé:po émnamdé katomang. Karsabí aiyo:pé kinsuto mo:píso turnapé aya:ngo:ki turra:mang. Mo:píso turnapé murkong kokkipag turra:dag. Ainé bottané ga:ri, mobayil, bottané okum mola mé:pola du:napésin murkongko lagidag. 

     Do:lung kumrí-dorí appíng réngamei ainé aimang agomém luyirdag. Émpige:la murkong kokki sé:kosin ka:dum modum sumang. Do:lung réngamém métageibong bík jonnan ajonkídídei ka:dum modum sutokumang. Aso aso:pé Gomukké kinamdé bojéla longékoném  Gomugbí sé: mo:jarné mo:písém odokké okum érang aí-ami: appíngém mépagla u:yu amo:pé gíkangkung. 

     Émpila takam sí:sang ya:me bímbírém lupangko ané-abu:ém mé:tín suma:pé lo:dém abar banging:ko murkong mékumsunamko ipé lagidag. Murko:ma:mílo turdag ayirso do:nyibí ruwad bidaggom kémodag. Kapéné gomug kéla Karsangké do:yídém appíngéi pola kinto murkong kama:la kapé Karsabí Gomugmé ainé bottané hospitallo kinam ka:la:ma:la sé: mo:jarné amo: sokké sika:ji. Sé:ko lula:dan siloké mé:posé yampo kapiyéson? mo:píso bottaya:né atiyarédei murkong. Yampo Karsangké ba:budémpé nokkésin aí-ajin nok kéra:lokké yokpa:ngéké.

Doksiri দকচিৰি, জানুৱাৰী, ২০২৬