Okum

 

OKUM

                  Jiten Noro

yogírémpé é:nkong émné sí:tíl ísíngki

Banji ko:bang palígla

Sélek tassém kablígla

Di:ba: jéjíng soli: pi:torki

Nok monam mé:po okumdé

Silo katokuma:bong ta:to 

Dok tayo:do ngolu motémdungku 

Élíng lí:sab mílígla poka okum asam taip

Démya:sin gíbado:la modung 

Síkírlo hitar, gudolo AC

Mojeik mílígla monam bilding RCC

rojaba:ri pa:ta:lok talí-lígad

Ronganoi, obonori:lok e:long,bortag 

Tíngír,taga odokké késung apí

Dulung,Poba,Pabo rijab sí:lu:lok sisug- siré

Néi nékung kídídé silo leke do:yingé

Ga:ri-motor mobaillang kompiutar 

Intarnetki silo ngolu mo:písém

Bottané do:lungo:pé mé:sudung

Émpige:la silo -

Ngolukké ésaré ka:rémpé namdígdung

Dewali potkang bukkampé bo:mé

Buktér buktér bugdung

Maur jo:nil sikampé tani:yé ya:pu:pu:laddung

Kumli lugé:la opíné opíném mégu gurmínsudung 

Rísu among légangé mimongé mimongém 

Mo:sumémé mo:sumém pamínsudung

Migyabdo ukpagla uksedung

Kéréng kéré:pé du:né do:lung okumém

Kamponé gasorki pungkomlígdung

Sipu-siladné tani: amírém 

Kindang ta:to !

Ga:ri-motor kamanggom 

Lamté bélam aimanggom

Mongku amongém mo:nula

Aríg -ísíng ila 

Néi nékung dola

A:né assém tí:la

Nolu mé:pola turdungai

Silo ngo ru:né pínémé kumlí:dung

Lékoda ta:to ya:yoké édé 

Ainé aín adídém bilatkuika.

Doksiri দকচিৰি, ফেব্ৰুৱাৰী, ২০২৬