Ali A:yé Líga:so No Gílangku

 

Ali A:yé Líga:so No Gílangku

                    

                                                   Dipti Rani Pe:gu

                                                                        Junai

No gíyeku émna sumbi:l lé:tung 

Yakan mibu galugdém,

Lígang longédo míbu galugdok

Lédulo lí:né yakané onnoki tu:bí pagnam 

Érkog dumérdém 

Tukoksula bomyépé émna pirla 

Lé:bitung pera ara:do,

Silo nok bilígunam do:jígdém pa:to,

Lékoném asinsé dídí-kokoko a:dag 

Mélo konnok abbug apka:mínsunamdém 

Rediolo tatsuto

Bangkar ara:lo roang ge:la taniém

Aumko apketo émna.

Ngok jiyosé kama:péi ikang 

Líga:sé anin aninlai gía:du:bo

Nom toya:l dung.

No gíyéku émna mé:mangai!

Émdaggom nok légang 

Ampi ambín, ngereg, a:sannam ongo

Nok tí:lí:nam po:ro apongém monínsula lé:tung

No gílangku.

No mé:pa:dakkun?

A:né rago ru:yidog 

Singgi appundé réyam réyampé punna dung

No gílangku ali-a:ye líga:so

An-yé gíla:pé murong okum lottadog 

A:m amli pídgotkodo,

 

Lo:le, gumrag, oi-ni:tom dumdum luppi:ki,

Mé:po méngan-ki í:ré pongkírpé 

Molai ngoluk líga:sém 

Turyar molai ngoluk dírbísém 

Gígébolai ngoluk mising réngamsém,

 No gílangku ali-a:yé líga:so.

Doksiri দকচিৰি, ফেব্ৰুৱাৰী, ২০২৬