ÍSÍNG

 

ÍSÍNG 

               Jiten Noro

Aíké donamém aííng molendo

Ngo gené ísíngé

Nésin,pi:sum, ma:né, ísíng

Ngokké bangkí aminé

Amo: tayo:do pírgabla

Nésin néyang émdo

Tapum tari: nesin doné

Ngom Dotínsula turdo

Léppíré ngokké asumdo

Gené amí:dé rémagdo

Agléng-akpang asudo:ko

Aipé ngo agamdo

Némíng-pi:sumpé pi:sum sumna

Mudjumém ngo bido

A:ye appunki kangírla

Oksijeném ngo bido

Amí: lékí: dokkéi

Agléng-akpang lendo

Amíngé ngokké tordaggom

Ngo étéd téddo

Ísíng kísapé ngo bottado

Amíngé torgel mí:tado

Agléng-akpang amo:lokké

Bojeko tayo:pé du:do

Ísíng lagimíl nolum

Ngoggíng kolok pa:yé

Émpige:la amíngko tégmílo

Nolu mí:nyiko lepa:ye

Ma:la gíné torma:né amíng

Ngoíng ma:né nésin

Bargapsula:sin barsa:do

Ngoíng  barsa:né nésin

Bígapsulasin turdo ngo

Siné ya:nélo:sin sa:do

Du:pumsula:sin turdo ngo

Takom tari:yémsin dodo

Asi, témpí, mekong, adi

Appí:loi ngom pa:yé

Dungkéng kísampéi ngok

Anguné olung pa:yé

Karbondai oksaid mu:jinna

Oksijeném ngo bido

Ngané takamém ngaturna

Turdí ajígém jigdo

Gené a:robé ngo

Sí:lungém pí:lendo

Alíg-asag mama:pé

Appíngém aipé mé:do 

Téktér tégyérla tégla

Dungkéng monyokyoka

Ísíng du:mílopag tani:yésin du:yé

Agomdém ménggaptoka.

Doksiri দকচিৰি, মাৰ্চ, ২০২৬