Murong Okum

Murong Okum

         

Ma:nying Pangging

Obonori, Lakhimpur

  Osomsé bojé-yanyané dírbí dírlab yonnusula du:né anguru:n mimong ako. Angu mimong lédulo luyi:sunan lamté kamang. Kapila:né émyemílo sok du:né angu angu opín mo:pínlok dírbí dírlab dokké angé bíro-kísapé mí:pumsunamdé botéya:pagné lugéngé dokké atég kangkiné. Sé ara:so Misingkídí:dé:sin angumang. So Misingké dírbí dírlablok ngago-ki:nikísané Murong Okumlok lugéngém aipé andéngo:pé lujarla lupé émna méngkídung.

     Osomsok aying mo:pín Misingké dírbí dírlablok ngago-ki:nikísan atégné karé okum aminko Murong okumdé. Sé aminsé Misingké dírbí dírlablok atég kangkiné. Édém okolo:sin luyi:sula lula:nammang, luyisukapé gínamdé:sin gímurye. Se:ko kama:mílo gínmur po:lolok sarbug ésarésin aríg inam lutégla ibomnam ru:tum gí:dí í:rdí  Ali A:ye Lígang lutadém Sara:bomma:song, se:ko du:té:manamki Po:rag í:rdíé alab labma:song, ayang si:lu lu:ma:song odok aminéi Murong okumé. Murong okum amindé okolokké kapé lenkan édém nérkíkpé lula:ma, émdaggom lubénglok sigla ka:mílo angu angu mo:léglo ajjo:kodaggom angumísunamko ka:begdag. Sémpé- mo:rong, mírong, murong sémbulumpé amin mínnamém ka:begdag. Émdaggom sok arang agomdé akamo:dag. Sok agomém lula gítung Osom Migomlok gomlab penson aman pa:ponga:rné tadgénam mitom, gomlab migang, do:yarné Torun sondro pa:mega:mbí lutung sémpé- mo:rong gompirdok luké:dé mukoli (মুকলি) mo:rong. Sé mo:rong gompirí:sokké méngkípé sé okum aminsé ‘Murong’ okumpé idung. Mo:rong gompirí:lokké luyonbomna gíla akke sé okumí:sém Murong manggom mírong émna:sin lula gíbomdung. Émdaggom Murong gompirdog lukéngém lujarla lubomnammém ka:begma:da. Émdagéigom Murong okumdé sémpin anguné karé okumko sidém di:bang (ía), tokta dokké taselok atékpé monamko. Murong okumlo bareé du:té:ma dokké mo:roné mo:léglo araipéla pontapé monam okumko. Sido do:lung réngamé gíkumsula í:r pongkírpé gí:dí í:rdí manggom angu angu réngam kébangém ba:la:dopé modag. Sé okumsok aíkémpé alod molodkídí:déi atégé. Sidé okumí:sokkéi ngarlendag Mising opínké dírbí dírlab turlamé dokké ya:me: mímbírlokké:bo irobla appíng si:rumlok tani: asinno ayang pu:mu pu:la réngamém pu:lubdag. Misingém luge:la:sin Bharot mo:rumlok péyang sanggalo du:né mo:pín kídílo:sin Murong okum du:namém ka:begdag. Émdaggomsin aí aíké agomki minnam aminé angu angupé ka:begdag. Karbikídí:dé ‘tengre’ manggom ‘phala’ (ফালা), Dimasa Kosarikídí:dé ‘Nondrang’, Lalungkídí:dé ‘samadi’, Réngam Nogakídí:dé ‘rensi’, Minyang dokké Galongkídí:dé ‘dé:ré’, Pa:damkídí:dé ‘musup’, Milankídí:dé ‘ngoptag’, Boríkídí:dé ‘beyanggo’ émna ludag. Murong okum ilod bomlodé tani:-ope:kídíng ara:lo:sin ajjok angunamko ka:begdag. Adi: mo:pín réngamlo Murong okumém réngam ka:sí:sulamné okumpé bomnamém ka:begdag. Buluk réngamlok ka:si mosí:sunané ru:tum ager gergurko okumé Murong okumdé. Ka:símosísunam agerém gerge:la:sin gí:dí-sí:pí, doman-tí:man dokké atí atí kébangém Murong okumí:lo ba:dag. Dokké:sin do:lu:lo néné-pané gía:péké émna kanggabnam agerémsin Murong okumí:loké gerdungai. Kapéné émyemílo po:pé édémpin néné-pané abadungai, aík olu:dém manggom do:lu:dém kangkanpé ka:si-mosi:sunamdém mé:pé idungai. Su:pag agin adíso Murong okumlok gerlodémsin angunamém ka:begdung. Po:pékémpé néné-poném motum patumnapé Murong okumém lagimang manggom po:pékémpé akon ope:lokké akon ope:ém pamínsukolo:sin gímang, pamínsupénam lukéngé:sin kamang. Sinum si:rok tani: mí:lod kídí:désin rémsa:dungkubo. Émdagdo réngamké mí:po sakpol du:nam légangé appíngéi asinko kado. Édémpé idagdo Murong okumlok alod angukunamdé igo-ikamé.

      Misingké dírbí dírlablok mépag la:ma:nammé Murong okumdé. Murong okumí:lokké ngarlendag buluk dírbí dírlab amlié. Murong okumí:lokké mélenlígdag mo:rumlokké akon mo:rumlo:pé Misingké atég kangkiném, atég lutadém. Appíng Mising do:lu:loi kangíré ngírra Murong okum du:namdéi buluk dírbí dírlablok atég kangkiné. Misingké aríg inam lutégla ibomnam ru:tum í:rdí Ali A:ye líga:lok mépaglama:nam ajon-kísané  Murong okumlok gergénammém luyi:sula:mang. Ali a:ye líga:do do:lunglok appíng si:rumlok 

ya:me mímbírlokké miné míjí:lo:pé léko lakkopé Murong okum lottalo í:r pongkírpé lígang so:man momaném idag. Odokké appíngéi aíké géli: bomliém gége: bomge:la lo:le ni:tom, oi-ni:tom molíg molígla démdum mankam mankampé gumrag so:maném so:dag. dokké purang apiném taléng ékkamki nudopé ra:nam ambínnok anguru:pé monam apin, ongo alang, take: kígdub, e:k adín oying, nogin, po:ro apong atí atí donam tí:nam, so:man momané lígang kangíré atékpé réngam ara:lo unna du:namém ka:begdag. Murong okumlokkéi appíng líga:lok gérpénam, ka:si:mosi:pénam agerém ka:si:mosi:dag. dok akampé Misingké aríg inamém lutégla ibomsunam ru:tum í:rdí po:rag (নৰাছিগা বিহু) lok mépaglama:namé Murong okumdé. Misingé a:m gatsumge:la manggom a:m amko:dé sanna bíntu:do ayirdo édé í:rdídém ya:me mímbír gídum gísetki do:lungé í:r pongkírpé po:ragém tí:dag. Do:lu:dok pagla:namdém ka:la ang-ngo dítag, kíníd dítag manggom íying dítaglo Misingé po:rag í:rdíém tí:nam ka:begdag. Kapéné émyemílo po:rag tíngkolo bojerungko murkongém lagidag. Po:raglo:pé goglígnam minom ope:ém gumrag so:manki boríksuge:l asutko terrasumogel po:ro manggom nogin apong dokké ti:tag tí:ra dorasumoge:la apin dokolo:lo:pé gíríksudag. Dokké:sin réngam ainam, do:lung rémnam légé:pé atí atí kébangém Murong okumí:lo ba:dag.

       Murong okumé Mising réngamlok dírbí dírlab dokké réngam ka:si:mosi:sunam appíng agerém gergabla gerrobko okumé émnam agomém taléngké lubomnam agomkídí:tokki kangkanpé kinna:to. Murong okum-déma:mílo buluk dírbí dírlabé kangíré ngírye émnamdém lula:ma. Émdagdo Murong okumém Mising réngam dírbí dírlab ara:lo turra du:monamdém kangkínam takaméi sakpa:ye. Kapila:né émyemílo angubomné adí si:lu lu:yud manggom oang rékam dírbí dírlabé a:té:la édémpin opín ko:je be:damé adí lédulo yogbompé idung. Édémpé idagdo Mising réngamlok pin-yo burné dokké opín kébang daggurki ka:si mosi:sunam agerém gérra du:pa:ye. Ékíma:mílo a:péné adí longélo yogma:ye émnamdém angkéng pigapsul lula:ma.

Doksiri দকচিৰি, মাৰ্চ, ২০২৬