TMPK-DOK LUYUMKANNAM AGER

 

TMPK-DOK LUYUMKANNAM AGER

Mg. Bhobo Dole:

        Tani: réngamlo ainé ager kola aima:n agerko du:do. Ainé ager gerném amme:  luyumdo. Aima:n ager gerném amme: yirka:do. Luyumkannam agerdé luyumru:yé odokké luyumpénamé.Porinamko aimílo bím luyumyé.Aidopé Agom lujo:mílo bímsin luyumyé.Yari yarjo:mílo bímgom luyumdo.Édémpin agerém régamé ka:la dungng.

         Ngoluk Mising réngam ara:lo akkéngko opín kébangé dung.1924 dítagdo Mising Ba:né Kébang,1971 dítagdo TMPK,1972 dítagdo MAK,1980 dítagdo MDK,1990 dítagdo TMMK,1993 dítagdo MMK ém ba:lenka.Odokké aí aí agerém aí aíé réngam pu: po-jarpobonam léga:pé gerbomna dung.So "Takam Mising Porin Kébang"mé LUYUMKANNAM ager ékké andé:pé atkanntung.

1) Sí:sang gí:dí sí:pí:

       Mising Ka:sí:sunan Milung mimag mola du:dag arangído Mising réngam ara:lo aíké sí:sang ommangém aíké dírbí lékorém léngkanam léga:pé 1996 dítag dokké "Mising Youth Festival " ém TMPK ké gergurki ibomna dung.Sok néríng lékíng agomdé sémpé - Sí:sang gí:dí sí:písé sí:sang kídí:dok pinnyo írné pu: po-jarpobonam dírbí bison-la:son odokké aíké opíndém léko-lakko monané bétténé karéko.Okolo so:nam,ni:tom,do:sog odokké dírbí-dírlab dírka:mínsunam idoji.Odokké sí:sang kídíngém léko-lakko mola ainé ager germonam odokké mé:monam.Odokké bílennam agerém geryarmonam.

           Ngok Mising do:lung ara:lo ainé ainé sí:sang ommangé attílok mojo: molabné dung.Édémbulum malennam léga:pé TMPK-YÉM “Mising Youth Festival”  monamdé ainé LUYUMKANNAM ageré.Bulum luyumpénamé.Réngamé aséngko bipéru:nammé.

2) Ko:kang Midang 

            Rémsa:ya:nam mo:rumko manggom ésa:né opínko lenmopé ésa:né, pori-luriné lu:mulok agomko lumíloi ngoluk ané agomko mé:pa:dag.Kapéné ko:kangém ésa:né ,kinné-pa:né odokké rémsa:ya:nam lu:miko lenmopé anédépag Ila:dag.Édémpila ané takamé pori-luripé lagiyé odopag ngolu rémsa:ya:né mo:rumko Toka:la:dag.

            Ménggésunam tani: Nepuliyon bí ludungai - Ésa:né opínko pa:pé pori-luriné anéko lagidag.Édémí:pé Bharod mo:rumsok po:péké abu APJ Abdul Kalambí ludungai - Ngoluk Bharod mo:rumsok odo mimé bonsitodak.Odok arang agomdé ko:kang midang monamdé.A:péné sí:rum sí:sangém ésa:népé onam odokké ainé lu:mipé lennamdo ko:kang midangdé bentapé pé:tumdag.

           Ko:kang midang émyémílo yi:la:pi:nyi kéígné kídí:dé si:jí:suné manggom si:jí:sunéman milbong lo:pé midang binamdém ludag.

   Kapila ko:kang midang modang - Opan-ki:panné ané-abu kídí:dé ommangém porai la:ma:la amilo bipagmílo aiyyé émna ko:ka:pé midang mola bipagnamdé aidag émna mé:dag.Ko érangé édé ujugdém anna yambo érangé la:dag. Kin-go ruwag pa:mangko mo:léglo abaya:pé ko:kang midang moya:dag émna ludag.Ané-abu Pori-luriné kama:la bulu giu pílígdag.Lomna Amil bipakpé émna mé:namko kadag.Mida:dok aro lukéng kinma:nam,Mí:bo odokké midang su:pag réla:nam attarémpé idung.

Ko:kang midang dok aima:nam -

            Ko:kang midang momílo ko:kang kídí:dok pangkamém pa:lamang.Ko:kang midangdé a:nglok odokké amírlok dumsíglok angu am lendag.Ko:kang midangdokki ko:néng kídí:dé Kin-go odokké migom ager pa:namlokké ngasod a:dag.Amír I:dné mimé odokké Anu ojíng sinamdok arang do:yingdé.Ko:kang midang ki ané dé:la ojíngdé pustihinota imodag.Lédu-lamkupé bí Anu sí:rumém pusti kama:pé idag.E:me la:nam,Néng mépakkunamdém ko:kang midang monamdokki idag.

              Ngoluk Mising réngam ara:lo:sin ko:kang midang monamém ka:pa:dung.Émdodo Pori-luriné mimé kakuma:pé idung.Odokki édé ngasod kídí:dém mopun:nam léga:pé " Takam Mising Porin Kébang" ké gergurki ko:kang midang monamdé aimang émna do:lung do:lu:lo réngam kébang banggo:nam tarung ru:namém ka:pa:dung.Émdaggom ko:kang midang monamdé aiyo:pé motum la:ma:da.Moyarla mo:pé lagiye.Mising réngam pu: po-jarpobonam léga:pé mimag moga:lo TMPK ém ngo anguru:pé aséngko bidung.Luyumpénam ageré.

3) Yari Yarmonam -

            Yari yarmannammé amír odokké asin ésa:né manggom ékérainé odokké mírléb appí:lo pu: po-jarpobonam Gergénam idag.Bí amírlok léé-lékur ,kínggí:né odokké I:d ka:sí:namém idumsudag.Angupésin a:nglok ní:jébnam éssa:modag.Ménggabnam mé:yarmodag odokké Ménggabné bélam pa:dag.Odokkésin yari: kokki ope: mé:nam,luyir agom odokké Igurbonam anggo odokké aí mé:tinsunam pa:do,oko ko:kang odokké sí:jí:suné appí:dok léga:pé aimonné.

          Ngoluk Mising do:lung ara:lo édé Agom kídí:dé sí:sang ko: ko:néng kinmang.Odokkésin yari: yarmannané yari: lotté kamang.TMPK -yé édé pí:ramné ager kídí:dém gerra Mising ko: ko:ném kinsu modung.Gíné 2023 dítagdokké "Mising Sports Carnival" ila sí:sang sí:rumém yari yarmodung.Odokki buluk amíré ésa:dung odokké turnan bélam pa:nam ma:nyingko pa:dung.Odok léga:pé TMPK-yém réngamé aséngko sé:lígru:pa:yé.

4) Drag Tí:ném Motumnam :

           

   Drug tí:la mo:pí mo:lulo aipé aima:né kinampé léngkansudung.Sí:sang sí:rum turdíém drug angírnamki abayang sí:sangké turdí momíg-mosíksudung.Ngoluk Mising réngam ara:lo:sin édé aima:n kinamdé do:lung ar:lo a:la sí:sang sí:rumé aíké aín turdíém monyoksudung.Édé aima:né kinamdém MOTUMNAM léga:pé ngoluk do:lung do:lu:lo TMPK -yé kinsumonam kébang ba:la drug motumnam agerém ka:pa:dung.Édé ainé agerdém gerra lédu-lamkuké lu:mipé ipéném ainam bélamko léngkannamdé ainé réngamko pa:nam émna mé:pénammé.Odokki TMPK -yém aséngko bipénammé.Buluk gernam agerlok sé luyumpénam agerko.Bulum réngamé aséngko bipéru: lagido.

Rémsa:ya:nam-বিকশিত, Mo:rum- ৰাষ্ট্ৰ, ésa:né- সুস্থ, Lu:mi -নাগৰিক, Pori-luriné -শিক্ষিত, Si:jí:suné - বয়সস্থ, A:nglok/Asinlok- মানসিক, Amírlok- শাৰীৰিক, Anguné/ Dumsíg anguné - বিকৃত,Mírléb appí:lo - সৰ্বাংগীন,Ménggabné- একাগ্ৰতা, Ní:jéb -চাপ, Ope: mé:nam - দলীয় ভাৱনা, Aimoné-উপকাৰী, Igurbonam anggo-নেতৃত্বৰ গুণ,Tébég/I:d ka:sí:nam-ওজন নিয়ন্ত্ৰণ, ভূমিকা-Gergénam, Angírnam-আসক্তি, Kinam-ব্যাধি

Doksiri দকচিৰি, মাৰ্চ, ২০২৬