ঐয়াও

 

ঐয়াও

               নৰেন নৰহ

                 লখিমপুৰ 

ঐয়াও সাৰ পায় পহিলা কুকুৰা ডাকত 

তাহাঁতৰ কঁঠাল গছৰ  কিপাৰৰ শব্দত জাগে

হালোৱা এছাৰিৰ চিট চিট মাত

কিম্বা বলদ হাল খেদি বজোৱা বাঁহীৰ সুমধুৰ ধ্বনি 

জাৰকালিৰ লিংলিঙীয়া পুৱতিৰ বাট

চকামকা পোহৰত কুঁৱলী ফালি

হাতে কান্ধে লৈ যায় ওখোন দলিমৰা

দ'ম দ'মকৈ আহু খেতিৰ জাবৰ পৰি আছে পথাৰত

চেঁচা বতাহৰ আলিংগনত

ঐয়াওৰ তেজাল দেহাৰ

শ্ৰমজল দেহতে শুকায়

দলি জাবৰ কৰি মাজে মাজে

অইনিঃতমৰ সুৰৰ লহৰ তোলে

ভাগৰুৱা হালোৱাৰ ভাগৰ হৰে

মন আৰু মাতত জোৰ বাঢ়ে 

ঐয়াওৰ তাঁতশালত

নানা ৰঙৰ এগে গাচৰ ৰিঃবি গাচেং

গনৰ উগন-মিবু গালুকৰ

আপ্পুনবোৰে শোভা বিয়পায়

ঐয়াওৰ সোণোৱালী দুহাতত

প্ৰাণ পাই উঠে

নগজিন-পঃৰ আপং 

পুৰাং আপিন

গাঁৱৰ ডেকা-গাভৰুৰ সৈতে

লৃগাঙত হিয়া উজাৰি

গুমৰাগ চঃমান-মমান কৰি 

সকলো দুখ-ভাগৰ যায় পাহৰি 

 বসন্তৰ পথাৰত কেঁচা বনৰ গোন্ধ

আকৌ অইনিঃতম আনুনিঃতম বতাহত উৰুৱাই

বিন্ধা ডৰাডৰে নিৰনি নিৰাই

ব্যাকুল চকুযুৰি অহা-যোৱা বাটলৈ বাৰে বাৰে চায়

উজানত ধৰা সৰু বৰ মাছেৰে

ৰঙা চাউলৰ ভাত খোৱাৰ হেঁপাহত

একাঁঠু-একঁকাল পানীত বুৰ গৈ

আহু ধান কাটে ভয় এৰি জোকলৈ

এফালে আহু ধান চপোৱাৰ কাম 

আনফালে শালি ধান ৰোৱ-তোলা

লানি নিছিগা  অলিখিত কামৰ তালিকা

ঐয়াওৰ কোনো দিনে আহৰি নাই।

___________________________

বিঃদ্ৰঃ - মিচিং শব্দ 

 কিপাৰ -উৰাল

এগে গাচৰ  - মেখেলা চাদৰ 

গনৰ উগন - চুৰিয়া 

মিবু গালুক -মিবু চোলা

আপ্পুন  - ফুল

নগজিন আপং - বগা মদ

পঃৰ আপং - ছাই মদ 

গুমৰাগ চঃমান - গুমৰাগ নৃত্য

চঃমান-মমান  -  নাচ-গান।