Édílai Omépé Ila:yélang

 Édílai  Omépé Ila:yélang

Mg. Prosanto Kumar Pa:yeng

   Umbori:bí nérkíkpé togabla rokpo porok kokpo dando:m yupko asubém mépakge:la Kíjír po:lo lok tangar ngarríksula sikírné korongké asilokki to:rum-to:tumsula jinlíksula írsu mopu:suge:la okum ríngngong-ba:ri bangkung lok takam agerém íra:dok abíng-ame: kídaré se:kosin lupakla:ma:dope gerjubla gerbidungai. Íra:dok se:ko íngkom dola-tí:la aipé mé:podagji; kapé lumílo mé:nyi:ma:ji édé appí:dém buluk mé:pokampéi ibi-mobi-lubidungai asutko mé:yingé émnamko édílo:sin mé:suma:pé. Dépé longé gíyartíkang. Awo-ommangé:gom íra:dé bojeyarkang. Dépila íra:dok agerém atér yamé:dé gerpí:-mopí:sula:tokumang. Kérang kémpé sabgab sabgapla se:kom kapé bipénama:ji édébulum mé:mur-méngkursula se:kaimé bipénammém se:kaimé bimur bikarra lékoném akí-ayilok gengkosupa:dungai. Dépidogom bí édílo:sin luríksumangai ; dépila bím aima émna:sin lugu:mangai ; luge:na:sin aropé ayangé déddíné írang ami kírí:dém ka:sí:mosí:bomna du:bosunamdém mé:pénamme émna mé:yinsudungai. Léko léko bík léga:pé tuksula ménam apin kosagém íra:dok sé:kai kotémsudodo bipaksuge:la mo:ka:dok du:né ukkam kírí:dém ratkum ratpa:ge:la sanné mirsékké mekoldo ba:bukge:la asiko pílusula yumbu-yumlu:sulíkla aki: bí:dolai bí:ma:lai dolíkge:la asiko tí:liksugé:la, lompu-lommula mo:kang-kerai, aram-bati:kíríem bé:pu:-mopung ge:la yublí:-yuptabla  yubkapébo émna mé:la olíksudanna asublo kéda:dag.

   Lu:jarlo du:né omédé Yakasi:bí pogolokké yumé ayirdo gíalangkula ané-abudém ainam-aimangko taumínsudag. Édétu lo:dípé inam ager tarungko. “Aidopo donam-tí:namko dodu:n doma:n ? Do:nyilo alíko gílen gía:ma:pénangka rampéké. Amiké jegé:ké lujék-lurék mínsula yema:péka. Bulu luyo sudogom memgénangka ! Mipak lukampé hohilé hompodok pay émdag ke; tatdu:bon”,  Anédé WLL sargom kokki lumo lumola asin díklíkla luyirdag. Ra:dang awo Jo:mídbí angé ko:nédém pogolok atí atí korsang lang dobo-tí:bodung émna lutékla alíko murkongém kolígtídung. Ané-Abudé:gom mé:mitla:ma:la aropéi murkongém lagiru:du:pémín  émna mé:la kokam kokampéi kapéi kapéi idogom mílígbitídungai. Édílai lunamkíddíko murkongém bilíkla:mayé émyémílo Abu-Anélok bík kosag pa:pénam amongéméi kobitéi émna do:ri modungai. Ané-Abudé íngkoko kapé imolo:ya émna méngkín-mé:mínsula du:dodo yamé:dé aíké ager gerra ogo:sula du:do ayirdo ojíng omédé yubkodokké jé:la jé:la kabsangkang, édém tatpa:sula yamé:dém ge:dung, “ommangém kapina ka:sí:ma:n; íngko pakkíné agerém gerdu:néya éi”. Ojíng oten omédégom tatkin dakné kísa jé:yango:kang. Yamé:dé duklíg duga:sula jin-go:la omédém ni:yad dag. Bí aídégom miksi dílíksula ayug sunna ojí:dém nyi:yubdag. Bí aídé mé:sula du:dag olíksula gernam déddíné "Ngokké isi íra:so gíadokkébo gernam ager kírrí:dé ingkol gíkanéya”.

Doksiri দকচিৰি, মাৰ্চ, ২০২৬