ATÉR OMÉ OI:SÉNG

 

ATÉR OMÉ OI:SÉNG

Bhaigeswor Pogag

   Oi:seng bí Pé:péngké  atér omé. Bím abu anédé mé:ngkampé pori mola lé:tung. Buluké okum éra:dok bí aipé aya:namé.Bí buluké do:lu:dok Bi.E (B.A) pa:spo:né. Buluké éra:do omé kamala bí aipé jarsudag.Bím sekai dígdopé luyemílo kabdungai. Émpila bím sé:kosin ta:npé lumangai. Oi:sengbí okoko mayeji édéméi ané abudé bidungai. Atí pí:am momangai.

Aso aso:pé Oi:seng bíté mímbír bírka:bo. Ané abudok angkélokké aso aso:pé pérog rogbadé kapé yíngngusudoji édémí:pé aso aso:pí yíngngu:sudubo. Bí adí ayir ka:ma:pé asin méngkampéi gígosula  yedag. Mimé ru:pa:suma:pé yumé mokutsula okumpé gíadakku. Pérogé pítírlo  a:ngkummíloi, Mising réngamké omé jiyori été okumlo gíadoku.Oi:séngbí longé yumé kinsuma:pé ajon arumlo yedag. Okum gíangkupénamém kinsumang. Omé jiyori é okum gíangkuma:mílo okum érangé aipé mé:dírdo.

Longékolo buluké  abí:né akídok  ao:  Ogíng képé abu anédé yamné tadbito. Ogíng bí praibet bengkolo migom ager idag. Ogíng bí:sin  akí omé émna aipé mé:bodag. Oi:séng bí émpigela Ogíng bím aipé mé:mang.Bí bíkké porijon ajon Ogam  bím aipé mé:dag. Ogamké abu anédé mirémdag odokké abudé migom ager gerdag. Ogam buluké abar murkongé bojeko dung.Émpila mé:pénamé kamang émna Oi:séngbí Ogam bím mé:bo dungai.

Ogambí kole:j gídung émna ajon arumlo lédulo apong,graks, ka:ni bang okkomsin mépagma:pé  tí:la dola yedag. Bí ko:kalokkéboi ané abudém morídla murkong kolenbomdag. Aso aso:pé ogambí édém bulum mépagla:ma:pé ikang.

Longé kolo Oi:séngké anédokké bottané kinamko a:la uyu amo:pé gíkangku. Supag Pé:péng bí:la bíkké omé Oi:séng bínyi:ong du:dag. Oi:séngbí:sin abudok lutumnam tadma:pé Ogamképé  dukpakkang. Abu:dé ané abu agom tadmang émna bím mépakto. Émdaggom aíké onam ao: ommangém séko mépagla:don. Ami: ka:ma:ng ka:ma:ngo:pé lési lésila abudé ka:rola gídakku.Oi:séngbí abudém amik takotpé mé:dag.Abudém ka:língéimang. Bí Ogambím aipé asinang obomsudag. Bí Ogambím ainé ko: ko émna mé:la gítagai. Aso aso:pé Ogamké sorid kídardém kindungku.

   Oi:séng bí:sin anépé ika:bo.Bí omé annyilok anpé ika:bo. Omé kídardé:gom iskul gídu:bo. Ogam bí omé kídardém poraipé lagido émna kinsumang.Bí ka:ni bang, draks tí:pa:ma:mílo Oiséngbím démdag. Abu anédok abar murkongém kongab dongabla su okkosin kakuma:bo. Ané abudété longéko uyu amo:pé gíkangku. Ogambí su tumnémpé gígo gígo:la yedag. Édé do:yi:dém Pé:péngbí  bírodok alagdo murkong bilígla hotel kulilangka émna luyirla mílíkto. Abboidé Oi:séng bím sé murkong sokki hotel ko kulia du:langka émna luyirgela gítoku.Abboi dok lukampé Oi:séngbí hotelko kulito. Ogambí:sin tumla ager atung kama:pé gígo gígo:la yekang. Okum kumrí kinsukumapé ikang. Omé annyi:dé:sin bottausa:du:bo.

  Pé:péng bí:sin miji:ngkabo. Adín amíré lartokuma:bo. Leke kémpé gígo:la:tokumabo. Émpila bíkkí sima:ngo:pé omédém do:yingko lubipé émna mé:dag. Abboidé gíla gogbikaku. Émdaggom abudém kangkolo gílíngkumang.

  Longékolo abu:dé bojeko mola:pé ikang. Atér omébím sidag po:pé lékkong  ka:lídungku émna bírodém luto.Ame:né abboidok agomém Oi:séngbí taddag émna bím gogbidokupé urríkto. Bíkké gokkakupé gíledag me:lamdoi Pé:péng bí ngatérsuto. Oi:séng bí gíala kangkunamé abudé ngatokuma:bo. Abudok migmodém léko ri:yiddung. Abudok alagdo okaiko yumgabbola do:dope ka:la alagdém ta:porto. Alagdo do:jikko yumgabbola lé:tung. Do:jigdém alagdokké ta:porla porito.

Aya:nam atér omé, No ngom aima:pé  mé:ma:péka. No ngokké atér omé.Nom ngo lo:dí ajjaula: du:do:pé ka:bomsula du:dungai. Ngo ya mé:mémsutoné? Ma, no ya abumé mé:mémtoné? Lo:dí:pé ané abu:é ao: ommangém aila yenamém ka:lí:dag.Nomsin ngo bottané migompé ila asé:la du:do:pé ka:lídagai. Émpigela ngo édémpé nom molatomang.No ngom mépagla gídodokké ila nokké na:nbí nokké légangé do:ma: tí:ma:pé du:la bottané kinamko a:la ngom atérpé mépagla uyu amo:pé gíkangku. No:sin ngom mépagkto. Ngokké okkosin katokumang. Oné ané abudé onam ao: ommangém ka:ma:pé du:la:donei? Nokké du:gém ka:ra:sulama:la ngo nokké ba:boi ké alagdo nom hotel kulido:pé murkongém bilíkka. Hotel dokki no abar barnyiko molensuladopé émna. Nokké omé annyi:dém porai bottané tani:pé mola:dopé émna. Nokké ommang kídardok légapé no éddíko asin odagji ngosin nom édémí:pé odag. Ngo nokké légapé 10 lakh ko nokké amindok benglo murkongém lé:bitung odokké ngokké aminloksin 5 lakh ko lé:sutung. Ngokké amindok du:né murko:dokki nokké na:n ké:lang ngokké dodga:dém punalangka. Nokké amindok du:né murko:dém  lalen-gekula nokké hoteldém bottapé ilangkuka. Éddíko ngokké aminlok amo:ngé du:song  édé appí:dém nokké amindok potta mobila lé:bitung.Pera dém kubla ka:langkang. Pasbuk kídardé perado dung.

 Yampo ro:ye ammem yirkangkosula yema:péka. Abu apang ,Anyi annoi bulum ayangkosulangka. Ngo nom lubipénam do:ying bojeko dungkang.Ngokké ayang do:ying kídarsém nom lubisulama:pé ngo sémpéi sibomtobong. Nokké ba:boi buluké ayang agomém tadlangka. Ngo nom ayangkolo aya:subadla no ané abu do:yingém tadma:pé ila silo aipé du:kpénampé ila dung. 

Sa nokké ayanam abu.

  Abudok do:jigdém porigela Oi:séng bí ba:bí bíla kapkang. Bí aíké mé:mur imursunam do:ying kídardém supaggo: kinsudungku.Bí mé:sudung supag kabdogom ba:bu bím Kaptur langkuma:bo, ba:ri ri:la ri:turlangkuma:bo. Tani: turnamsé sémpé idagbong émna mé:sula kabla dungka.

Doksiri দকচিৰি, আগষ্ট, ২০২৬