DO:LUNGÉ SIDÉ NGOK DUNGKOÉ

 

DO:LUNGÉ SIDÉ NGOK DUNGKOÉ

                                              Tuniram Médok

Rokom píang píma:dapé

Péttang démuglok kinsuné,

Do:lungè ngok kangkiné

Lo:dísém mé:po méngaé.

Du:né sidok ísing-ílíngé

Gesi geyomla kangkané,

Bírduglo akléng béggédopé

Appun a:yem ka:la mé:poé.

Gé:yarpé bídla du:tíné

A:né kekon kesakpé,

Réyampé du:né okumé

Appíngé jubla dungkoé.

Do:lung a:né pígodo

Laorpé bídné asido,

Dígín Diu kinma:pé

Sardung ngatur ésaré.

Lotta lottalo punlégé

Yumé Rouwé kinma:pé,

Nampo-nama:né lo:dípé

Dungko ngoluk do:lungé.

Mo:té:pé muksub-muglubé

Dungko ngoluk dungké:ngé,

Amdang a:mé yaug yaugé

Adípé pédong odu:né.

Aín émpin amdang arígé

Mé:podung do:lung réngamé,

Dígín tangarém yonsula

Tolígdung kasiém mímbíré.

Dunggén arígdo mo:té:pé

Tupunné arígé kangkané,

Mé:bo ni:tom tomnamdé

Asin rongkid ro:yidé.

Ali a:ye,lotta so:mané

Ya:me mimbír lékopé,

Amig amig bérríksula

Mé:pol so:man mandu:né.

Oying-oge,Ongo appíngém

Madoloi lo:díp pa:duné,

Sekkaiké pí:ram attu:lo

Ormínsula appíng dodu:né .

Okum gi:sang atílo

Raktub so:man mandu:né,

Sekkaiké ngastko a:yegom

Appíngé ka:dum sudu:né.

Doksiri দকচিৰি, জুলাই, ২০২৬