Kapila Ayisopé

 Kapila Ayisopé

Gubin Noro

Lakhimpur

Dangga- Noro Pamín

           Su:k Arunasol lu:jarlo Damro émko mo:léklok ru:yilo ame-are:né tani opíné abako dungai. Tayeng kídíngé(Daro ríkko:pé) Lo:ying-Parak kídíngé(Damro ríkko:pé) Dangga-Noro kídíngé(Noro yi:be:lo) Nalung-Pogag ope:é (Dasinglo) Bodír-Bo:jo ope:é Bo:dír-língkab yi:be:lo, Damin-Dang ope:é Gí:ponglo, Taku ope:é Tu:rilo, Perme:, Pértín, Borang, Ratan, képanglo, Me:gu -Tayeng ope:é késinglo, Riyang ope:é karnanglo, Légo ope:é Maryangto ukum bomla dung/dungai.

       

       Longékoném Papér-Pangkomké abu Képangbí Yamné a:né tolígla lé:nam benta kangka:pé gíge:la gílattokuma. Papér bí:lang Pangkombí bíyek abudém sé:kai moketo émla mé:namko kakang. Mokenédém sogappé émla annyidé ésoko ba:lígla IMOko(réngam donam) iye e'mla ru:yilok du:né appíng taniém gokto. Odo lupangko luto se:k do:lung tanié Papérké:lang Pangkomké abudém moketoji bulu édé doko:do:pé gípé lagima émlasin lupa:to.

           oddar papérké:la Pangkomké ga:resuné é soko yokkang. Depila bíye bíro kumsudé Lo:yong yi:be:do gíla odok tani:kídí:dém taunamé kinma émla lusuto, émlai kapiyen, buluk ajjsoné ko:kang kídídé adin dola du:nam ka:pa:la bulum taunammé ko:kídí:dé lusuto, buluk do:lu:dé Ampang-pi:me gídí-sípi írka, odolo ésoko bangka e'msuto. Lo:ying yibe tani kídaré posol Dangga Noroké ru:yi:pé gíato. Tolopésin Papér, Pangkom bulu gíbomla aré lagidag émla ajengém je:la Dangga Noro, le:ying-pogag lékolo Papér Pangkom démla pala ménníktoku. Lédupé Papér bí:la Pangkombí Pa:dam taniém goksula Dangga Noro, Lo:ying, pogag tani:ki pamínsula Dangga Noro, Le'ying Pogag ope:é Noro yibe:dokké gípagla Baridu émko mo:takdog Idu-Misimi ru:yilo du:mínka.Édé Dangga Noro bulu Misimi ru:yi ga:nam tatpa:la Pa:dam, Perme kídíngé odosin bulum du:momílo aima:ye émla Samsingmena mé:la Samyingmena bíyem le:sila lups:to. Depila Samsing bí:la sampíngbí minompé gogge:la dobo tí:boge:la Dangga Noro, Le:ying Pogag tani:kídí:dok abí:nékídarém paketo. Ame:n kídaré odokké dukpala Dambug ru:yilok Migom Pígodo dungge:la Sodiyapé toga:to.(1585)