Sé:kom Kétinsula No Ang Pítadu:n

 Sé:kom Kétinsula No Ang Pítadu:n

                        Mrinangka Patir

Nok méngkamardémpé ngo kangkanma oiya

Émdaggom taniémpiné dumsíkko dung

Nok mengkamardémpé imang ngo oiya

Emdaggom mengkinnané asinko dung

Nok méngkamardémpé mirémma ngo oiya

Émdaggom tani turkampé turra dung

Nok méngkamardémpiné okumé kamang ngokké

Émdaggom Do:nyi Ésar Pédong takkomsunane

Po:yupko dung.

Kangkan ka:yum mirém opandé me:lampémang

Lékoném adí lékor siyadé yadyudbomdoku

Oud-tentenla araigénggéné írga:né okumdo

Argomé bugdo ta:paré pardo.

Sé:kom kétinsula no a:ng pítadu:n ?

Sé:kom lutinsula no bottapé lusudu:n ?

Nok le:sog-gor émné amír adindé

Adíkolo sansug-sanrugyéku

Kinpíma:nam mo:píkolo me:lampé yogyeku.

Pakkípé mé:sunamdé jubné mé:lodmang

Bottapé lusunamdé arainé lambém gíbomang

Kangkan ka:yum manamdé turgod lambé manammang

Mirém opan signamdé aro tani mélodmang

No ayangé remma:mílo.

Nok kangkandokké aré kamang

No ayangé remma:mílo.

Nok mirémdokké aré kamang.

Okai, nok méngkamardémpé kangkanma ngo

Nok méngkamardémpé mirémma ngo

Émdaggom tani:pé turnané a:ngko dung

Taniyé taniyém kangkinnané ayangé dung.