Nébíngke Lupénam (সম্পাদকীয়)
Lékola du:mamílo léko appíngé ako ako yokpagyé. Yokpodanna yogyé ngolukké Mising opínsé. Kapéné émyémílo supakpé:sin ngolukké tani:kídísé aíwarkémpé asinang obosula ager gernamko ka:pamang. Ngolu appíngéi kindag globalization adíso mo:pípaksém do:lung akkongkopé igela bíro bírrmang kisapé ager atungém gerbosu:la, aya:bosula ayangki du:yarbosula du:nam mé:lotko émna. Émpige:l ngoluk opín ara:so airupé nékamínsu:namko ka:begdung.
Bí Sa:yangé, bí pagrouwé, bí oyané, bí mo:yingé émnamdé su: yokkangkubo. Édé ainé agomé. Ngolu kapilai opín aminkídídokki pa:mínsu:l du:yén ?
Ngolukké kangkin akkongko. Édé Mising-é. Mo:píso ngolum Mising Opín émnapag kindag. Angupé ngolukké Kangkin (Identify)-é kamang. Émkunammé ngolu aíké mising opín léga:pé lékopé ager gerpa:ruyé. Ajjou ajjouné agom-agerki mé:nyingka:mínsu:namdém mépagdíkabo.
Mé:lo konno ngolukké du:téng among dhemaji mo:dum ara:lokké ngoluk opínsém nésu:la lunéko social media-lo ludagai émna tadbegdung. Mo:pípakséi kindag ngolu ansi:né opínko émna. Émdaggom akke agomé ngolum ansing ansi:la gusamodag. Émpigelasin rékkérépsu:la du:padag. Kapilané, édé réngam ageré. Réngam agerém atéroung gerramang.
Réngamsém mirémbopé émna mé:domílo ngolu lékoru:payé, lékopé dakorém korbomru:payé; lékopé agerém gerbomru:payé. Lékomamílo lo:dísém lédumokutsuyé. Lékomílopak léko agomé mirémyé, dírbíyé unjeryé.
Tapan Lal
Nébíng (সম্পাদক)
Doksiri দকচিৰি
No comments:
Post a Comment