KÉBANG ABUPÉ KINNAM SONDRO KANTO LASON

Juwel Pe:gu

juwelpegu@gmail.com

01. Onam:- Mising agom-gomlab pu:po-jarpo moné Mising Agom Kéba:dok ménggésunam kébang abu kungke:dém lénnyiko tedgurné amikai po:sum Sondro Kt. Lasonbí. Bím otagai Sibsagor mo:dum Pani Dihing mouzalok Dimow-Dolopa do:lu:lo. Onan longédé Lakhi Purnima 1937 do. Iskullok adgapkampé 1 Sep/1939. Bík abu-anédok aminém Tongkiram Lason éla: Dentuli Lason émtagai. Angngo bíro-bírma:dok po:sum Lasonbí Olum aoai.

02. Porinam:- Aíké do:lung LP iskullokké LP ém pongabge:la do:lu:lokké 8 km mo:té:pé du:né Rojabari ME iskullo lékor – III do aminém adlíktungai, émpige:la 15 August, 1950 dok taré-mo:tondé a:la ponamém ngettetpa:to. Émpidaggom bík porilí:namém ka:la Head Masterdé lékor IÍ do:pé double promotioném bito. 1954 do Mg. Lasonbí lékor ÍI dém pongabla ME dém pa:sto. Do:lu:lokké 15 km mo:té:pé du:né - high iskullo bangkí bangkí ngasodém gébomna admissionto. 1958 do Metrikuleson examém under university of Gauhati lokké pa:sto. Bottapé porilí:né a:ng kané Lasonké porilí:namém ka:la do:lung-ope, akon-asagé bidumsunamki Sibsagor kolejlo bí admissionto. Lasonbí  IA exam. bidí ayirdo Rly pulislok SP Numol Sondro Panggingké ibonamki NF Rly Maligaon lo junior clearkpé pa:to. Rly lo Élark agerdém gergabge:la IA dém pongapto. Rly lo ager gerra du:tungí:la Lasonbí 1960 do B Baruah Kamrupa Akademi lo BA ém (night section) admissionto. Émpige:la sakori gernamdémla porinamdém léttérpé ibomkolo airu:pé ngasoddungai. Édémpila exam bidí ayirdo bík anédé aipakpé mola:ma émna mé:supé molennam telegram ko dept. ru:tumdém bige:la sakoridém mépakto BA exam binam légangé. Sakoriyém mépagge:la Lasonbí 1966 do BA dém pa:sto. 

03. Midang:- Migang Lasonbí BA dém pa:sdag léduké dítag 1967 do LP mastor gerné mimé Sunolota Panggingké lédulo midangém da:to. Su aumko ome-magbo éla: ako ao-yaméng kadung.

04. Migur Ager:- Ex minister Romesh Muhon Kuli:ké gerbonamki Lasonbí 1 February 1968 do Dibrugarh Universitylo upper division Asst. Postdo migur agerém pa:to. 31 dítakkopé DU lo bangkí bangkí opisar post agerém gerra 1 Sep/1999 do Asst. Register (F/A) dokké pensoném pa:to. 

05. Réngam Ager:- Mising agom gomlablok bottapagya:né kébang MAK dok kébang abupé kinnam Lasonbí 1969 dokké 1979 do:pé Dokin Poriya Satro Sonmilondok kébang abupé dungai. 9, 10 & 11 Oktubor 1981 do MAK ké Jengraimukhlo ba:nam 5né Mirum kéba:do Lasonbí Kébang abu-oipé du:pongka. 29, 30 & 31 January 1983 Buroilo ba:nam 6né tagnyi-dítag mirum kéba:do:sin Lasonbí kébang abu-oipé pangkaku. MAK dok ménggésunam kébang abupé 12, 13 & 14 May 1989 do Jonailo ba:nam 10 né tagnyi-dítag mirum kéba:do:la 21, 22 & 23 Feb 2005 do Gunasutilo ba:nam 16né tagnyi-dítag mirum kéba:do milígé Lasonmé kébang abupé tolíkka. Dok po:pé Lasonbí 1981 dokké 1990 do:pé Dibrugarh Taon Mising Kéba:lok kébang abupéla: 1980 dokké 1989 do:pé Dibrugarh BAKlok abupésin dungka. 

06. Adnam-Monam:- Po:sum Lasonbí potin atíko bottépé attoma émdogom Mising Agom Kébang bélamém síkkanla aba-ba:nyiko gomsarém atka. MAK lok kílam la:lennam potindémsin Lasonbí adboka. Dr. Numol Sondro Pe:guké adnamki Lasonké gombe:ki monam ‘Siyoké tadnamdé oko a:bangéji’ odokké ‘Oiya aína ngokké a:pígé’ émnam tatponé ni:tom ba:nyidém Dibrugarh AIR lok karpumpulilo takaméi tatkítak. Ménggappénamko migang Noren Tayeké lulíkki Digrugarh AIR lok lígang longélo yumé Mising ni:tom taru:dém ‘Karpunpuli’ émna Lasonbí minníktagai. 

07. Sinam:- Ngolum takamém mégé:la ménggésunam Lasonbí 2 June/2011 do Dibrugarh, Milan Nagar P-Lane lo du:né aíké okumlo 74 dítagdo sikang.

08. Aré Ankang:- Mising Agom Kéba:dok ménggésunam kébang abupé lénnyikopé du:né po:sum Lasonmé kinma:né taniyé réngamso kamangéi émna lula:dag. Bí football odokké atí-atí kenamlo pagla ME lo pola du:do:do:bo Gyandayini Sabhalok nébí:pé du:bekka. Sibsagor Kolejlo IA pola du:dodo All Assam Inter-Kolej music competition (1959) lo 1st positioném pa:namdé pakkíru:né a:ng kanéko émna lupé aido. Aí-ami samba:pé bérokpé agom lula MAK dokké atí-atí kéba:lo du:la lédu mokutsuné Mising réngamsém appípéi pu:po-jarponam légangé mé:né Lasonké a:ngdém méngkíru:pénamko. Dibrugarhlo poril du:né opeyém jonsula kangkin kébang ba:nam, sakori mola du:né kídíngém jonsula Ali-Lígang inam do:bulu aíké réngam légangé nérkík asin génamko ka:pa:dagai. Yubngaksul du:né Mising réngamsém kébang banggo-lugo:la turdagdok aín adíém gíngabmoto. Lupé luyém aíké ao-ommangém ainé amipé badmolokké ibomna aíké réngamsok agom-dírbí arígdém parí-rí:la jarmonam légangé bojéko ager gerra gíkang. 

09. Ngok Mé:namko:- 1989 do Jonailo ba:nam MAK mirum kéba:do ngo volunteer pé ige:la kangkinsudodokké MAK nébíng ajonpé ila May 2011 do Dibrugarh Nursing Home lo turla du:dopé ka:térdodopé ka:pa:nam ménggésunam Lasonké miga:né dumsígdém la: írga:né asindém édílosin mitpan kama:yé. Ru:né-pínémé kumpa:dung, Do:nyi-Po:loké amo:lo bík iji-yalodém ésar bi:bi:la du:motéika.