KOGEN KAIKÉ LULOD-MÉ:LOD    

       

                                            Mg. Ronuj Kumar Payeng

                                            Ph- 7099729594

                                              Ghunasuti 

                                           

Kogenbí tulonangké ríang aoko. Bík abudé kogenmé ajjaodokkéboi iskullo poraitomang. aríg-ísíng mokolo momodsula ríga: ríga:lo so:bo-menjeg kanggabkolo addém gímodsuto. Menjeg amírro renggab-renggabla ogab -ogabla tu:tok pempa mutkoloi mudmodsuto . Kogenbí ajjaodokkébo mising agomo:dém lukintobo . oinupé mipag agoméméi lukintoma:bo. Mipag taniém rígsudaggomsin agomém lupo-tawsukinmang. Kogenbí:sin édílai édílai mipag amikosin bík asin do:yingko kíbisulíngkíní:dag. émpige:la lukino:mangkolok kogenmé buluk do:lu:do mising tanikídí:dé mipag agom lukinné kídídé 'kogen monbang, kogen monbang' émna minnígtobong.

  Kogenmé buluk do:lu:dok tani kídídé se:kosinéi ménggésumang. Kogenké ao-yaméngésin kaka:bong. ommésin amilo yamné gíngabka:bong. émdaggomsin kogenmé taonolok mukkang mastorké inglis mediamlok porainam ke:ji uano:dok porayo:nam ajjao:né ko:dé:sin kogenmé abudok kogen monbang émna gognamdém tatge:la 'kogen monbang' émna luka:bong. okolai lambé pédu:lo rígsugomsin édílai édílai  do:lu:lo mukkang mastorké aoa:dé:sin okolopé gíkan 'kogen monbanga?' émna gogla yedung. kogenbí ményemílo ko:a:dé ngapu ngadadsula dugdagku. kogenbí aídé léko léko mé:sula du:dagku ----'ngo: aroru:péi monbangka:bo:song! mipagkídídé:so:lo ngoluk mising agomém akkosin lukinma:n. taonolok di:si o:si kídídé:so:lo mising agom lukinma:n! émpige:la bulum se:kai monba:né émna lukítaglang! buluk monbangkírídémsinéi ngom atéro:ngém sablígdu:bo:n!' émna kogenbí aídém lusukang.

Longékolo buluk dungor pa:ta:do kétog ayirdo lésorainam so:bokídídém sarren-ge:kula asi sunamge:la ké:né ísíng ígyumdo olendor bí:la kogenbínyi du:bosuge:la unam unampé do:yingém kíbosukang.

"ngoluk mising agomsém kapila mipag amikídí:dé luma:song.mipag míjíngko ngoluk mising do:lung ara:lo:pé gíadaggomsin ngoluk ajja:o:né ko:kang kídídémsin buluk mipag agomí:dokki taula lupomínsudag. ngoluk ko:kangkídíngésin buluk agomí:dém lubipénampé idag. ngoluk mising ommangkídísé kindagru:míng . mipagépag monba:dag". --- agomdém kogenbí lukang.

"no mipag mipag émna lugénamdém aidagnémpéi mé:dang! ngoludan mipag agomém lukinsinmang tatkinsinmang . ngonyik mipag mipag émna lugénamki mipag yerungkídíngolo runggogéi gíadu:bo:pé;  bulukké pulisé makanangé daktoré mastoré de:kko du:ma:lang ataya! ngo:dan pésodag déi" --- olendorbí kogenmé lukang.

Anyipagdé ao-yaméng kané abbobo. émdaggomsin bínyik anyidé "sumyoméi rígsulangka mipagémdan rígsumoyoka" émna po:lo anupé karsa:yekumíloi ígsa ígsa:la kumsuné anyyikona.

Kogenbí taonpésin gíkíma:pé ima. pulis tanangémsin kangkítag, di:si o:si dungkomsin kangkítag. taonpé kogenbí gípo:dandodém mukkang mastorké léddu:lo gímínka. tanié tanié ga:rié motoré gíkensula:ma:pé gítag-duktagsula dagtítag. édémbulum kogenbí kangge:la aipé ujig-amagsugékang. mukkangmé kogenbí taonpé gípo:dolo í:r-pongkírém ka:begsula taonsé silo lígang bihuéi tanié í:r-pongkírélang anu anu galuk gasorém géru bomru:suge:la yengabamdag! odokkéi mukkang mastorbí kogenmé 'kogen monba:sé luma:nam agomko luka:bong' 'monbanga taonsé lo:dém sémpéi idagbo' émna luge:la hutelkolo:pé gíabola apinko dobopé émna huteldok apin doko tébul sokilo dunggabbosukang. 

'oko okkom lagiyen porog adin ,e:g adin luken a:nlukel?' émna huteldok biya:né hutel boy kídídé bínyim taukang . mukkang mastorbí mipag agompé lula apiném adiném dopo donganné apin oyingém tí:po tí:poné naréto:to:né assém ngamdo ngamdopé alo mírsém dobeg tí:begsupa:la kogenké asindé longédém aipé mé:posukang. longédém mukkang mastorké konam konamdéméi huteldok biya:né ko:kídí:dé bidagai émna kogenbí lo:dém mé:la dungkangku. Doré-tí:rédok arédémje: mukkang mastorbí bige:la gítoku édém kogen monba:bí kintoima. do:lu:pé gílen-ge:kula kogenbí 'taonélé minomém bola apin-oyingém tatla tatla ujo:dagai, taon taniémsin aimang émna lukípésin lupa:mang déi' émna lutíla yekangku.

 Mukkang mastorbí kogenké huteldok dogélígnam doré amérém bikolo gasum murkongé dé:pagkang édém kogen monba:bí kintoimang...

Longékolo lékoda olendorbí:la kogenbínyi ongo makolo papang pa:tangdo:pé ésab érkolo gíbosuka. kekonso bínyik anyidé ésabdém érbosula dagdolo kekonolokké pulis akkéngko lékko:pé abbugém gordu gordu:lo jo:bomamla dagge:la olendorla kogenbínyim ollungki ko:rígsupo:téi émna mising pulis ako gogla dagai. puliskídídém ka:suge:lai olendorbíla kogenbínyik anyidé amig pirnyidém pirtapagmoge:la "bangkoné bangkoné abungém bangko:pé émna ido" émna luge:la pésola jinbosula ésabém érkuma:pé tusugsuge:la lomna lomna dukbosula do:lung ara:lok yumra: sí:lu:lo durkebbosula lonyikopé apin menna du:bosukang. émpige:la rokondém olendorké tatkolo kogenbí lusudungku --" longkoké puliskídí:dé  abbugdokki abgablígpéké émna:míng ngo dugtoku, ngok dugkodo no okodém dugmínkakun?"

"éi lé:yang no:lang ngo lékko: pa:ta:lok ésab érné, no dugkumílo ngo:sin dugpa:yekubo:tu, ngokké amigé kama:pe:m puliskídí:dok abbugkídí:dé abgabmílo ngom ukpagma:yepém"--- olendorbí:sin agomdém tosadanna luto.

"kindang olendora, taonolok puliskídí:dé ngoluk  migom o:nam iki émpé inné. do:r do:r émyemílo  dugbomna rékpéné"-----kogenbí lukang.

"atay kogen no mukkang mastorké lédulo taonko gíkítonémmíng édémbuluméi kindung.

ngo:na: míjíng jíngkuragso:pé taon kangkíma:pé sipayebo:pé..... lékoném se:kai ngom ayabila taonélém so:péi gi:bombiyya:kumílo" émna luge:la olendorbí arai gínggípé sagíko gíkang..