ভালে থকা নাই

ভালে থকা নাই 

ভাস্কৰ জে নাথ

(কবি ঋষভ নাথৰ হাতত)

মেঘবোৰ 

অথবা হ'ব বিচৰা বৰষুণবোৰ 

মাৰ যাব খোজা শেষ তৰাটি 

অথবা আত্মাত উঠা প্ৰতিধ্বনি

চিলমিল টোপনি 

জাৰণি বাঁহনি

চৰাইবোৰৰ মাত-গান 

সভা-সমিতি 

পিয়াহ খাই থকা কেঁচুৱা 

অথবা শুই থকা মাক

পাৰ হৈ যোৱা ৰাতি 

অথবা ৰাতিপুৱা

জহি-খহি যোৱা শিলৰ পতাকা

সহ্য অথবা ঘোষণা নকৰা অনুভৱ

ছবি অঁকা দুপৰীয়াবোৰ 

অথবা ছবি চোৱা চকুবোৰ 

কিতাপ 

ৰাজনীতি 

শিল্প 

প্ৰেম

ভবিষ্যতৰ নক্সা

মিনতিত ৰাখি 

ছুৰী বহুৱাই 

ফালি চিৰাচিৰ কৰি আছোঁ ভোকৰ ৰুটি ॥