NOMMÍNG MAGO:LA DUNG

Juwel Pe:gu

É:lo, nommíng mago:la dung

Lupangko lubipé émna

Pétu tupun do:yíngko

Pétu tupun alégdo dénggo:né

Po:pír do:yíngko

Po:píré pírnungé re: re émna

Toya:l dung a:né kekonélé

Nom ríksunam légangéi

No gíyénéi lékkongkodaggom?

Atér rongngamo:pé

Ngo ankindung

Nok su:pakké mé:téng-du:téngém

Adí angíré arrubnam

Nok dídí-kokoné asiném

No mé:motsula dung

Ako ka:pa:ma:nam mo:pílok

Ka:tumsuné kéré:do

Lukéng kama:né gombugékkém luka:mínsula

Odokké lumotsula okeleppagdung

O:rí:né sirungkolo

Édémpila ludung—

Ansu-ka:sul gílentokug

O:koi imanggom mé:pentok

Nok asindok mé:yad-mé:tumdém

Ka:lang pétu tupuné punnyé

Asin mé:rasukodo ni:tompé ila

Ni:tomdok tomké:dém tatkinmanggom aiyé

To:ríkídí:dém lamtéko mébilang asinlo:pé

Angkéngé tadjubyé tupunné po:pírké

Re: reainé ni:tomém

Rémi-jémi:pé tatpa:yé—

Po:píré pírnungé re: re

Pírnungé anungé re: re

Odo nok atugdé tí:pogyé

Turpunné tíngírém

Asindé:sin mé:pogyé

Tupunna punné ma:nyíngém

Oddoi no batpagyé

Ako ka:la ka:lo:ma:nam tupunpé. 

Doksiri দকচিৰি, জানুৱাৰী, ২০২৩