বিষ্ণু ৰাভা এতিয়াও বহু ৰাতি
নাছিৰ আহমেদ
শিমলাবাৰী, গোৱালপাৰা
বিষ্ণু ৰাভা এতিয়া কিমান ৰাতি?
বিষ্ণু ৰাভা এতিয়াও বহু ৰাতি !
এতিয়াও এমুঠি অন্নৰ বাবে,
এখন বস্ত্ৰৰ বাবে,
এটি বাসস্থানৰ বাবে
কৃষক-শ্ৰমিকৰ ঘৰত নিৰন্তৰ হাহাকাৰ!
অথচ, কৃষকৰ নাঙলৰ সিৰলুত সোণৰ ফচল ফলে,
সেউজ-বননিৰে এই ধৰাখনি ভৰপূৰ হৈ পৰে,
ঘৰে ঘৰে ৰূপোৱালী হাঁহিৰ নিজৰা বৈ যায়।
শ্ৰমিকৰ হাতুৰীৰ কোবত বৃহৎ বৃহৎ অট্টালিকাসমূহ গঢ়ি উঠে,
কল-কাৰখানাত দ্ৰব্য-সামগ্ৰী উৎপাদন হয়,
যান-বাহনৰ চলাচল আৰম্ভ হয়,
গাঁও-চহৰ-নগৰ নিৰ্মাণ হয়,
মানৱ -সভ্যতাৰ উকমুকনি ঘটে।
তথাপি এমুঠি মুদ্ৰাৰ বাবে,
অকণমান সংস্থাপনৰ বাবে,
আত্ম-সন্মানৰ সৈতে জীয়াই থাকিবলৈও
এতিয়াও কৃষক-শ্ৰমিকৰ ঘৰত নিৰন্তৰ হাহাকাৰ!
বাটে-পথে নাৰী বিবস্ত্ৰা,
নৰক যন্ত্ৰণাৰ বোজা কঢ়িয়াই পাৰ কৰে শিশু সন্তান,
সন্ত্ৰাসবাদীৰ আগ্নেয়াস্ত্ৰৰ আঘাতত জৰ্জৰিত যুৱক-যুৱতীসকল,
বৃদ্ধাশ্ৰমেই হয় বৃদ্ধ-বৃদ্ধাৰ শেষ আশ্ৰয়স্থল।
বিষ্ণু ৰাভা এতিয়া কিমান ৰাতি?
বিষ্ণু ৰাভা এতিয়াও বহু ৰাতি !
এতিয়াও পুঁজিপতি কৰ্প’ৰেট গোষ্ঠীৰ দপদপনি —
এই ড্ৰাগনৰূপী অত্যাচাৰী শোষক-শ্ৰেণীয়ে সমাজত অহৰ্নিশে চলাইছে শোষণ, নিৰ্যাতন, হত্যা, লুট আৰু ধৰ্ষণ!
প্ৰতি মুহূৰ্ত্তে ভুলুণ্ঠিত হৈছে মানৱ-অধিকাৰ।
এতিয়াও
প্ৰাপ্য শিক্ষাৰ বাবে,
সুস্বাস্থ্য বৰ্তাই ৰখাৰ বাবে,
প্ৰাকৃতিক দুৰ্যোগৰ সৈতে মুকাবেলা কৰাৰ বাবে
কৃষক-শ্ৰমিক আৰু নিছলা দুখীয়াৰ ঘৰত নিৰন্তৰ হাহাকাৰ!
বিষ্ণু ৰাভা এতিয়াও বহু ৰাতি
এতিয়া সাৰে আছে মাথোঁ শোষকৰ দল
সাৰে আছে সিহঁতৰ সূক্ষ্ম শোষণ-যন্ত্ৰ!
নিষ্ঠুৰ, স্বৈৰাচাৰী শাসকে নিৰীহৰ বুকুত চলাই গৈছে নিৰ্মম উচ্ছেদ কাৰ্য।
সিহঁতৰ ঘৰ গৈছে উঁৱলি,
ভেটি-মাটি গৈছে জহিখহি,
পিন্ধনৰ বস্ত্ৰ গৈছে ফাটি-চিঙি।
অথচ! তথাপি ভঙা নাই সিহঁতৰ টোপনি।
বিষ্ণু ৰাভা এতিয়াও বহু ৰাতি!
বিষ্ণু ৰাভা এতিয়াও বহু ৰাতি!
ডাছ-কেপিটেলৰ বহু পৃষ্ঠা বাকী!!
Doksiri দকচিৰি, মে, ২০২৫
No comments:
Post a Comment