শিলৰ পোচাক
ববীতা দাস
তামুলপুৰ
বিষাদবোৰ ঢাকিবলৈকে
অৱশেষত তাই
এযোৰ শিলৰ পোচাক পিন্ধিলে
শৈশৱ
কৈশোৰ
আনকি যৌৱনৰ যন্ত্ৰণাও
শিলৰ তলত লুকাই থাকিল
কোনেও নেদেখিলে।
ওঁঠ, দুই চকু অথবা আঙুলিবোৰত
লমালমে ওলমি থাকিল মৌনতা...
তাই আকাশ চাই অভিমান কৰিব নোৱাৰে -
শিলৰ তলত তাই।
বৰষুণত মিলি যাব নোৱাৰে তাইৰ বুকুৰ বাৰিষা -
শিলৰ তলত তাই।
উজাগৰি ৰাতিৰ বতাহ জাককো তাই শিলৰ তলৰ পৰা
শুনোৱা নাই বিষণ্ণতাৰ জীয়া কাহিনী;
পোচাক নামৰ শিলৰ খোলাত ভৰাই থোৱা জীৱন!!
তাই আজিও পিন্ধি আছে
শিলৰ পোচাক,
শিলৰ তলত কোনেও নেদেখা
টলবল বিষাদৰ জীয়া নৈ...
তাইৰ তপত উশাহত সৰি পৰে পপীয়া তৰা।
Doksiri দকচিৰি, জুন, ২০২৫
No comments:
Post a Comment