নৈপৰীয়া সৈৰিক
প্ৰশান্ত টাইদ
লখিমপুৰ
হলকৰ্মত মতলীয়া তুমি নৈপৰীয়া সৈৰিক
তুমি সুগন্ধি ভূঁইৰ অপত্য
তুমি বৎস এই নিসৰ্গৰ
তুমি এই গিৰিকৰ্ণিকাত
শ্ৰমৰ কঠোৰ বিনিময়ত
উপভোগ কৰি আছা
অবিলাসীৰ যন্ত্ৰণাময়
নাই তোমাৰ উপভোগৰ কোনো সামৰ্থ্য
সেই চহৰীয়াৰ বিলাসিতা
তাৰ উপমানত তেনেই অনুষ্টুপীয়া
যাৰ নাই কোনো একটিয়াৰ
সাজিবলৈ পুৰীৰ হৰ্ম্য
তথাপি নোহোৱা তুমি পৰান্নজীৱী
তুমি এই চাকিনৰ হামচৈয়া বাসী
য’ত নাই যাতায়াতৰ সুগম্য মাৰ্গ
য’ত নাই ৰোগীক প্ৰতিকাৰৰ
উপযুক্ত চৰকাৰী ডাক্তৰ-খানা
য’ত নাই উজ্জ্বলাবলৈ শৰ্বৰ বক্ষত
বিজুলীবাতিৰ উজ্জ্বল আভা
তথাপি তুমি জীৱনৰ সংগ্রামত
কদাপি নোহোৱা সোৰোপা।
Doksiri দকচিৰি, জুন, ২০২৫
No comments:
Post a Comment