অধীৰস্থ
ভাৰতী বসুমতাৰী
ক্ৰমাৎ লঠঙা হৈ যোৱা গছবোৰ
চাৰিওফালে বিয়পি পৰা জুইফুলৰ আকাশ
যেন এইমাত্ৰ গিলি পেলাব অজগৰ এটাই
দিহিং-পাটকাইৰ ফাগুন
শিলৰ খটখটিয়েদি সেইয়া কোন পাৰ হৈ যায়!
প্ৰাণোচঞ্চল, উন্মুক্ত
বতাহৰ দৰে বৰষুণ এজাকত
কিঞ্চিৎ তিতি যোৱা নিৰ্জনতাই
সুখী কৰি নিয়ে সমগ্ৰ
আৰু মই চাই ৰওঁ
নিৰ্বিকাৰ
সেউজীয়ালৈ গুচি যোৱা বসন্তৰ প্ৰতিপল উন্মুখ অধীৰস্থ।
Doksiri দকচিৰি, জুলাই, ২০২৫
No comments:
Post a Comment