অসমাপ্ত চিঠি
বাংলা কবিঃ অমিতাভ মিত্ৰ
তৰ্জমাঃ ড° ইকবাল হোচেইন খান
তোমাক লৈ চিঠি এখন লিখিবলৈ বৰ ইচ্ছা হৈছিল –-
এটা নিজম নিস্তব্ধ ৰাতিত লিখিবলৈ বহিলোঁ।
বগা কাগজত আৰম্ভ কৰিলোঁ,
ৰঙা চিয়াঁহিৰ কলমেৰে।
আৰম্ভণিতেই উছোঁট খালোঁ –
বাধা হৈ পৰিলা তুমিয়েই।
কি বুলি সম্বোধন কৰিম তোমাক।
হৃদয়ৰ মাজতেই কেৱল তোমাৰি অস্তিত্ব।
মোৰ ভাব হ’ল সম্বোধন কৰাটো মনৰ ভ্ৰম –
সঁচাকৈয়েই চিঠিখন যদি চিঠি হৈ উঠে,
মোৰ উজাগৰী ৰাতিৰ শ্ৰম সাৰ্থক হ’ব।
প্ৰভাতৰ প্ৰথম সূৰুজৰ কিৰণ মোৰ ঘৰত পৰাৰ লগে লগে,
মোৰ হাতৰ কাগজ-কলম আলোকিত হৈ উঠিল।
তন্দ্ৰাচ্ছন্ন চকু মেলি দেখোঁ,
চিঠিখন লিখা তো নহ’ল।
বগা কাগজ বগা হৈ আছে অতি পৰিষ্কাৰ হৈ –
তাত গোলাপৰ তেজ ৰঙৰ চিহ্ন পৰা নাই।
Doksiri দকচিৰি, জুলাই, ২০২৫
No comments:
Post a Comment