TANI:

 TANI:

                Tuniram Médok

Gíbídné ayir po:yubdo

Kasa:nam yumrang si:lu:dé

Silo tani: si:lungé pardung.

Taniyé,taniyé tolo: bolo:pé

Kangab la:ma:pé taniyé,

Taniyé silo íngkolo kaman !

Do:lunglo taniyé,lu:jarlo taniyé

Toyednam amo:lo:sin taniyé

Tapum gi:pé ginga:bomdung.

Du:té:sé taniyé bojebomdung

Among asié dungkamo:pé dung

Dungko-dakko pí:mínsuma:la

Si:lungém rakud kuda:bomdung.

Lambé pédung pí:mínsuma:la

Mí:ta-mí:me kinma:pé

Méngkampéi ésingém téngabbomdung.

Mo:jarné mo:písok

Ésing yumrangé ayidém pama:la

Ayirém togésuné mukkangé:sin

Pédong do:riém modung.

Mo:písé silo tani: mirémé

Tani: ijer mojerki

Dungké:sok ésar amongé

Du:la:dagla:ma:pé gunamé.

Longém gunamé,yumém gunamé

Do:mírté gunamé,ésaré gunamé

Gunamé silo íngkolo kaman

Lupénam agomdésin

Lukinmal urradla gunamé.

Doksiri দকচিৰি, নৱেম্বৰ, ২০২৫